Июн-июл ойларида Россияга борадиган Ўзбекистон фуқаролари диққатига

Россия Федерацияси Президентининг “Россияда Футбол бўйича 2018-йилги жаҳон чемпионати ва 2017-йилги ФИФА Конфедерациялар кубогини ўтказиш даврида кучайтирилган хавфсизлик чораларини қўллаш хусусиятлари тўғрисида”ги фармонига мувофиқ ушбу тадбирлар ўтказиладиган вақтда чет эл фуқароларини миграцион ҳисобга (рўйхатга) олиш тартиби ўзгартирилади.

Фармонга кўра тўртта Россия шаҳарлари — Москва, Санкт-Петербург, Сочи ва Қозонда 2017-йилнинг 1-июнидан 12-июлигача, шунингдек 2018-йилнинг 25-майидан 25-июлигача Москва, Санкт-Петербург, Волгоград, Екатеринбург, Қозон, Калининград, Нижний Новгород, Ростов-на-Дону, Самара, Саранск ва Сочида чет эл фуқароларини миграцион ҳисобга қўйиш муддати Россияга келган кунидан бошлаб бир суткагача қисқартирилди.


“Вақтинчалик бўлиб туриш (вақтинчалик ёки доимий яшаш) учун келган чет эл фуқароларини ва фуқаролиги бўлмаган шахсларни бўлиб туриш жойида ҳисобга қўйиш ёки яшаш жойида рўйхатга олиш уларнинг бўлиб туриш жойига ёки яшаш жойига етиб келган кунидан бошлаб бир сутка ичида Россия Федерацияси қонунчилигида кўзда тутилган ҳужжатларни қабул қилувчи томон ёки бевосита чет эл фуқароси ёки фуқаролиги бўлмаган шахслар томонидан тақдим этилгач, Россия Федерацияси Ички ишлар вазирлигининг тегишли ҳудудий органи томинидан амалга оширилади”, — деб ёзилган ҳужжатда.



Ўзбекистон Республикаси фуқаролари мазкур ўзгаришларни албатта ҳисобга олишлари шарт. Зеро ўз вақтида миграцион ҳисобга қўймаслик маъмурий тартибларни бузганлик деб баҳоланиши ва кейинчалик Россия ҳудудига киришга чеклов қўйилишига олиб келиши мумкин.