Ўзбекистон дунёнинг энг кучли армиялари рейтингида 48-ўринни эгаллади

Ўзбекистон армияси 106 та мамлакатнинг қуролли кучларини ўз ичига олган армиялар рейтингида 48-ўринни эгаллади. Бу ҳақда Business Insider журнали маълум қилади.

Ундаги маълумотга кўра, Ўзбекистонда 420 та танк, 715 та БТР, 69 та қирувчи самолёт, 65 та вертолёт ва бошқа кўплаб техника мавжуд. Рейтингда биринчи ўринни АҚШ эгаллади. Ундан кейин Россия ва Хитой армиялари келмоқда.

Жаҳон ҳарбий кучларининг индекси (Global Firepower Index) ҳар йили ҳарбий ва иқтисодчи экспертлар томонидан тузилиб, энг объектив рўйхатлардан бири ҳисобланади. Унда 50 дан зиёд турли кўрсаткичлар ҳисобга олинади. Рўйхатни тузишда нафақат, танк, самолёт ва ҳарбий кемаларнинг аниқ сони ҳисобланади, балки армиянинг кадрлар таркиби ва захираси сони, ҳарбий соҳанинг молиялаштирилиш даражаси, мамлакатнинг транспорт инфратузилмаси, нефть қазиб чиқариш, давлат қарзининг миқдори ва, ҳатто, қирғоқ  чизиғининг узунлиги, бир сўз билан айтганда, миллий армиянинг жанговорлик лаёқатига таъсир қилувчи барча омиллар ҳам инобатга олинади.