UzAuto Motors компанияси Chevrolet автомобилларини Россияда сотишни кейинга қолдирди

Ўзбекистоннинг  UzAuto Motors компанияси Россияда Chevrolet автомобиллари сотувини бошлай олмади. Сабаб сифатида сертификатлаштириш билан боғлиқ муаммолар, олдинги Ravon бренди бўйича қарзлар ҳамда давом этаётган коронавирус пандемияси кўрсатилмоқда. Бу ҳақда Motor.ru хабар беради.
 
UzAuto Motors компанияси General Motors компаниясининг Россиядаги ваколатхонаси билан биргаилкда март ойидаёқ Россия бозорига чиқишни режалаштирганди. Spark, Nexia ва Cobalt  автомобиллари Россияда сотилиши керак бўлган Ўзбекистонда йиғилган биринчи Chevrolet моделларига айланиши лозим эди. Улар мос равишда Ravon R2, Ravon Nexia R3 ва Ravon R4 моделларининг ўрнини босиши керак эди.

Бироқ COVID-19 эпидемияси ва карантин чоралари туфайли компания Россияга автомобилларни ўз вақтида етказиб бера олмади. Моделларнинг Россия бозорига чиқиши камида ёз ойининг ўрталаригача қолдирилди. Шу билан бирга, агар коронавирус билан боғлиқ вазият яхшиланмаса, Россияда Chevrolet автомобилларининг пайдо бўлиши ундан ҳам кейинроққа кечиктирилиши мумкин.

Anhor.uz мухбири UzAuto Motors компаниясидан вазият бўйича изоҳ ололмади.