12 ёшли қизнинг қотиллиги бўйича суд ёпиқ режимда ўтказилади

Жиноят ишлари бўйича Яккасарой тумани суди 31 январь куни Тошкент шаҳрининг Янгиҳаёт туманида содир бўлган 12 ёшли қизнинг ўлдирилиши бўйича ишни кўради, дея хабар қилади Олий суднинг матбуот котиби Азиз Абидов.

Судланувчи A.T.гa (1993 йилда туғилган) Жиноят кодексининг бир қанча моддалари, жумладан, ўта шафқатсизлик билан қасддан одам ўлдириш, зўрлаш ва ғайритабиий шаклда жинсий зўрлик билан қондириш жиноятлари бўйича айбланмоқда.

Суд мажлиси Жиноят-процессуал кодексининг 19-моддаси талаблари асосида ёпиқ эшиклар ортида ўтказилади. Унга кўра, барча судларда жиноят ишлари бўйича судлов очиқ ўтказилади, давлат сирларини ҳимоя қилиш манфаатларига зид бўлган ҳолатлар, шунингдек, жинсий жиноятлар тўғрисидаги ишлар кўриб чиқиладиган ҳолатлар бундан мустасно.

Суд жараёни якунида қўшимча маълумотлар берилади.

Судланувчи марҳумнинг уйида 2022 йил ёзида ёлланма ишчи сифатида таъмирлаш ишларини олиб борган.