2023/2024 ўқув йилидан бошлаб “дефектология” йўналиши бўйича грант тақдим этилади

3 март куни Адлия вазирлиги томонидан Ахборот ва оммавий коммуникациялар агентлигида Президентнинг “Ногиронлиги бор кишиларни қўллаб-қувватлаш тизимини такомиллаштиришга доир қўшимча чора-тадбирлар тўғрисида”ги қарори ижросига бағишланган матбуот анжумани бўлиб ўтди. Бу ҳақда Anhor.uz мухбири хабар беради.

2023/2024 ўқув йилидан бошлаб “махсус педагогика, дефектология” йўналиши бўйича магистратура босқичига тўлиқ давлат гранти ажратилади.

Анжуманда қарорда қайд этилган масалаларнинг муҳимлиги таъкидланди:

Ногиронлиги бўлган шахсларга давлат хизматларидан навбатсиз фойдаланиш ва давлат муассасаларида мансабдор шахсларнинг қабулига навбатсиз қабул қилиш бўйича имтиёзлар берилади.

“Юридик ёрдам” ахборот тизимида ногиронлиги бўлган шахсларга адвокатлар томонидан бепул профессионал юридик ёрдам (pro bono) кўрсатишни ташкил этишга кўмаклашиш тизими жорий этилади.

Адлия вазирлиги бошқармасининг бошлиғи Отабек Хақбердиевнинг айтишича, барча тоифадаги шахсларга юридик ёрдам кўрсатилмоқда. Юридик ёрдам ихтиёрий асосда адвокат томонидан кўрсатилади. Адвокат ногиронлиги бор шахснинг илтимосига биноан оғзаки, ёзма маслаҳат бериши ёки судда иштирок этиши мумкин.

2023 йил 1 июнга қадар ногиронлиги бўлган шахслар ва уларга ғамхўрлик қилаётган шахсларга бериладиган имтиёзларнинг ягона рўйхати шакллантирилади. Ушбу рўйхат «Advice.uz» юридик порталида жойлаштирилади.

2023 йил 1 майдан бошлаб касалхонада даволанаётган ногирон болаларни парвариш қилаётган шахслар:

– Болага яқин бўлиши учун шароит яратилади;

– Шу муддатга меҳнатга лаёқатсизлик варақаси ва бепул овқат билан таъминланади.

Агар бола педиатрия тиббий-ижтимоий эксперт комиссиялари томонидан ногирон деб топилган бўлса, унга пенсия тайинлашда уни тиббий-ижтимоий экспертизадан ўтказиш учун такрорий юбориш бекор қилинади.

2023/2024 ўқув йилида абитуриентларни қабул қилиш тартиби тўғрисидаги маълумотлар имконияти чекланган шахслар фойдаланиши мумкин бўлган форматда тақдим этилади. Видеолар субтитрлар ёки сурдо таржимаси билан ҳам кўрсатилади.

Имконияти чекланган талабани ўқув жараёнида қўллаб-қувватлаш мақсадида университетда унинг яқинларидан бири ёнида бўлиши учун шароит яратилади.