АҚШ элчиси Украина борасида Ўзбекистоннинг позицияси ҳақида билдирди

АҚШнинг Ўзбекистондаги элчиси Дэниел Розенблюм  мамлакатда Ўзбекистоннинг Украинага нисбатан позициясига қандай муносабатда эканликлари ҳақида гапирди. Бу ҳақда Kun.uz нашри “Америка Овози”га таянган ҳолда ёзади.

«Мен Ўзбекистоннинг позициясини тушунаман ва ҳурмат қиламан. Чунки биз ҳозир Ўзбекистон қандай оғир аҳволда эканини тушунамиз. Биз юқоридаги учрашувлар чоғида (Жорий йилнинг 6-9 март кунлари Ташқи ишлар вазири Абдулазиз Комилов бошчилигидаги делегация АҚШга ташриф буюрган эди – таҳр.) бу масалаларни муҳокама қилгандик. Географик ва тарихий омиллар мавжуд. Манфаатлар туфайли Ўзбекистон ўйлаб ҳаракат қилишга мажбур. Савдо муносабатлари ва капитал, Россияда меҳнат муҳожирлари ҳам бор. Улар юбораётган пуллар мамлакат иқтисодиётига катта сармоядир. Ўзбекистон учун бу жуда муҳим масала. Биз буни тушунамиз», – деди дипломат.

Шунингдек, Дэниел Розенблюм фундаментал тамойиллар ҳақида ҳам сўз юритди.

«Украинадаги оғир вазият ҳақида кўп гапирмоқчи эмасман, чунки одамлар аллақачон билишади. Лекин мен у билан боғлиқ баъзи жиҳатлар ва асосий тамойилларни таъкидламоқчиман. Чунки биз уларни Ўзбекистон билан муносабатларда эсда тутамиз. [Бу] суверенитет ва мустақилликдир. Биз суверенитет, мустақиллик ва ҳудудий яхлитликни доимо ҳурмат қиламиз ва ҳимоя қиламиз. Булар жаҳон барқарорлиги учун жуда муҳим халқаро тамойиллардир. Агар улар бир чеккага суриб қўйилса, кучли давлат бошқасини йўқ қилади. Биз буни Россиянинг Украинага бостириб кириши жараёнида кўряпмиз. Менимча, бу тамойиллар Ўзбекистон учун ҳам катта аҳамиятга эга», – таъкидлади элчи.

АҚШ ташқи сиёсий идорасининг вакили: “Позицияларни тушуниш учун очиқ гапиришимиз керак”, – деди.

«Жаноб Комиловнинг яқинда берган баёнотини тингладик. Менимча, у тушунтирган позиция асосли, мантиқий ва тушунарли. Саволингизга жавоб шуки, биз бу сиёсатни тушунамиз. Биз жаҳондаги, жумладан, минтақадаги долзарб муаммоларни ҳал этишда Ўзбекистон билан ҳамкорлик қилиш тарафдоримиз», – дея хулоса қилди Дэниел Розенблюм.

17 март куни Ўзбекистон Ташқи ишлар вазири Ўзбекистон Олий Мажлиси Сенатининг навбатдаги ялпи мажлисида маъруза қилганди. ТИВ раҳбари ўз нутқи давомида Украинадаги вазият ҳақида гапирди. Абдулазиз Комилов Украина атрофидаги вазият Ўзбекистонда жиддий хавотир уйғотаётганини таъкидлади. Шунингдек, у Ўзбекистон Украинанинг мустақиллиги, суверенитети ва ҳудудий яхлитлигини тан олишини таъкидлади.

“Биз Луганск ва Донецк халқ республикаларини тан олмадик”, – деди ТИВ раҳбари.