Буюк Британия Алишер Усмоновнинг USM холдингига қарши санкциялар жорий қилди

Буюк Британия тадбиркор Алишер Усмоновга тегишли USM холдингини санкциялар рўйхатига киритди. Ҳужжат қироллик ҳукумати сайтида эълон қилинган.

USMга қарши санкциялар бўйича изоҳларда холдинг Усмоновга тегишли ёки унинг назорати остида эканлиги, “Россия Федерацияси ҳукуматидан имтиёзлар олиш ёки уни қўллаб-қувватлаш билан шуғуллангани”, шунингдек, Россия ҳукумат учун стратегик ҳисобланган иқтисодиёт тармоқларида бизнес юритиши айтилади.

“Қора рўйхат”га Алишер Усмоновга алоқадор яна иккита компания – Curzon Square ва Hanley ҳам кирган.

“Биз молиявий тармоқни Россия элитаси ва уларга уруш учун пулларини яширишда ёрдам беришга уринаётганлар учун ёпяпмиз”, – деди Британия ташқи ишлар вазири Жеймс Клеверли. “Биз уларни муваффақиятли яширилган деб ҳисоблаган активлардан узишда давом этамиз”, – дея қўшимча қилади у.

USM, Curzon Square ва Hanley компанияларига нисбатан санкциялар “Усмоновга алоқадор активлар, жумладан, Лондондаги 90 миллион фунт стерлинг турадиган Beechwood House санкция остида қолади”, – дейилади ҳисоботда. Curzon Square компанияси тадбиркор ва Керзон-сквердаги иккинчи тоифали бино ижарачисининг Лондондаги офиси сифатида хизмат қилган ва у ҳам санкциялар остига тушган.

USMда Буюк Британиянинг холдинг ва унинг акциядорларига нисбатан санкцияларини адолатсиз ва асоссиз деб ҳисоблашини айтишмоқда. “Алишер Усмонов узоқ вақтдан бери тадбиркорлик фаолияти билан шуғулланмаган, холдингнинг 50 фоиздан камроғига эгалик қилади ва уни бошқаришда иштирок этмайди. Биз ушбу чекловларни ноқонуний деб эътироз билдирмоқчимиз”, — дейди компания.

Санкциялар орасида россиялик тадбиркорлар Владимир Евтушенков ва Сулаймон Керимовнинг оила аъзолари ҳам бор. Санкциялар рўйхатида USMнинг биргаликдаги эгалари Владимир ва Варвара Скочлар (улар бир йил аввал санкциялар остида қолган миллиардер Андрей Скоч билан боғлиқ), Евтушенковнинг ўғли Феликс ва қизи Татьяна (“АФК Система”нинг 15,2% акцияларига эгалик қилади) ва Евтушенковнинг рафиқаси Наталья, украиналик сиёсатчи Виктор Медведчукнинг хотини Оксана Марченко, Сулейман Керимовнинг қизи – Гулнора ҳам тушган.

Буюк Британия Алишер Усмоновга қарши санкцияларни 2022 йил 3 мартда жорий қилганди. Бунгача тадбиркор Европа Иттифоқи (ЕИ) санкцияларига тушиб қолганди. Бизнесменнинг адвокатлари Европа Иттифоқининг унга нисбатан чеклов чоралари Германия конституциясига зид эканлигини исботламоқчи эди, – дея хабар беради Süddeutsche Zeitung.

2022 йил сентябрида Европа Иттифоқи Алишер Усмоновнинг синглиси Саодат Нарзиевага нисбатан чекловларни олиб ташлади. Ноябрь ойида FT Ўзбекистон ҳукумати тадбиркорга нисбатан санкцияларни бекор қилиш талаби билан Европа Иттифоқига мурожаат қилган бўлиши ва унга ҳуқуқий ёрдам кўрсатишни таклиф қилган бўлиши мумкинлиги ҳақида хабар берган эди.

Январь ойида Алишер Усмонов бизнесни бошқаришдан узоқлашиш режалари ҳақида маълум қилди. Тадбиркор Ўзбекистон ривожига эътибор қаратиш ниятида эканлигини бир неча бор таъкидлаган.