Давлат хавфсизлик хизмати 1999 йилги терактларда гумон қилинган шахсни ҳибсга олди

Ўзбекистон ҳудудида оғир жиноят содир этгани учун 23 йил қидирувда бўлган “Туркистон Ислом Ҳаракати” (ТИҲ) халқаро ташкилоти аъзоси Ю.Ж. чет элда ушланиб, Ўзбекистонга олиб келинди.

1998 йилда у Чеченистонга Иордания фуқароси Амир Хаттоб томонидан уюштирилган жангарилар лагерида махсус тайёргарликдан ўтиш учун йўл олади, сўнг Афғонистондаги Туркистон Ислом Ҳаракатига қўшилди. Бу ҳақда UzNews Давлат хавфсизлик хизматига асосланиб ёзмоқда.

1999 йил январь ойида фуқаро Ю.Ж. айланма йўллар билан Тошкентга келади, бадавлат одамларнинг уйларига ҳужумларни амалга оширади, ўғирланган пуллар ва қимматбаҳо нарсаларни Афғонистондаги ТИҲ раҳбарларига жўнатади.

Ю.Ж. 1999 йил 16 февраль ва 30 мартда Тошкентда содир этилган террорчилик ҳаракатларида иштирок этишда гумон қилинган. 1998-2006 йилларда у халқаро террористик ташкилотлар таркибида чет элдаги ҳарбий ҳаракатларда қатнашган, деб хабар беради Давлат хавфсизлик хизмати.

Ю.Ж.га қарши қўзғатилган жиноят иши доирасида тергов ҳаракатлари олиб борилмоқда.

1999 йил 16 февраль куни эрталаб Тошкентда бир соат ичида бир қатор кучли портлашлар содир бўлган эди. Расмий маълумотларга кўра, 13 киши ҳалок бўлган, 100 дан ортиқ киши жароҳатланган. Ўзбекистоннинг биринчи президенти Ислом Каримов ўша куннинг ўзидаёқ терактни унинг ҳаётига суиқасд қилиш деб атади ва бу воқеада диний экстремистлар ва мутаассибларни айблади.