Германия ҳукумати Усмоновнинг синглиси Sister Trust компанияси орқали эгалик қилган яхтани музлатиб қўйди

Германия Федерал жиноят полицияси бошқармаси Гамбург портида қиймати 588 миллион доллар бўлган Dilbar яхтасини музлатиб қўйди. Бу ҳақда ташкилот твиттерига таянган ҳолда Коррупция ва уюшган жиноятчиликни ўрганиш маркази ёзади.

Аввалроқ Forbes манбаларга таяниб, яхтанинг ҳибсга олингани ҳақида ёзган эди. Терговчилар яхта Усмоновнинг синглиси Гулбаҳор Исмоиловага тегишли эканлигини аниқлашди. У, шунингдек, Усмонов билан боғлиқ бўлган самолёт ва вертолётга расман эгалик қилади.

Санкциялар тўғрисидаги ўз эълонида Европа Иттифоқи Германия Федерал Жиноят Полиция бошқармаси томонидан олиб борилган терговга асосланиб, Dilbar яхтаси офшор компаниялар занжири орқали Sister Trust компаниясининг “ишончли бошқаруви”да бўлган. Немис терговчиларининг аниқлашича, траст  Исмоиловага тегишли бўлган, деб қайд этди Forbes.

Германия суриштируви шуни кўрсатадики, Усмонов 2020-йилда “Dilbar” яхтаси, 350 миллион долларлик Airbus A340-300 самолёти ва Airbus EC-175B вертолёти каби бир қанча активларга эгалик ҳуқуқини Sister Trust билан боғлиқ  компанияларга ўтказган.

“Dilbar” яхтасида Усмонов Алексей Навальнийга видеомурожаатларни ёзиб олган. Forbes маълумотларига кўра, бу дунёдаги энг катта ҳажмли яхта бўлиб, унда сузиш ҳавзаси, иккита вертолёт майдончаси, сауна, гўзаллик салони ва спорт зали мавжуд.

Усмонов 28-февралда Европа Иттифоқи, 3-мартда эса Буюк Британия ва АҚШ санкцияларига учраган. Апрель ойида Усмоновнинг опа-сингиллари Гулбаҳор Исмоилова ва Саодат Нузриевага нисбатан ҳам санкциялар жорий қилинган эди. Аввалроқ OCCRP ва Guardian  қўшма текширувда Нурзиева Швейцариядаги 27 та банк ҳисобларининг ҳақиқий эгаси эканлигини, улар орқали сўнгги йилларда миллиардлаб долларлар ўтганини аниқлаган эди.

Исмоилова ҳақида олдин унинг акасига тегишли бўлган бир қанча активлари борлигидан бошқа ҳеч нарса маълум эмас. Аввалроқ OCCRP Исмоиловага Италиянинг Сардиния оролида умумий қиймати 26,5 миллион долларлик учта вилла ҳам тегишли эканлигини аниқлаган эди.