Харьковга берилган ракета зарбаси оқибатида 11 киши яраланган

Харьков области маъмуриятининг раҳбари Олег Синегубов Россиянинг Харьковга ракета ҳужуми оқибатида камида 11 киши жароҳатланганини маълум қилди. Унинг маълумотларига кўра, Россия армияси 10 январь куни тахминан 22:30 (Москва вақти билан 23:30) да Киев ҳудудига С-300 ракеталарини отган.

Ҳужум натижасида 30 дан ортиқ одам бўлган меҳмонхона мажмуасининг биноси зарар кўрган. Синегубовнинг таъкидлашича, сўз тинч аҳоли ҳақида бормоқда. Жабрланган 11 киши орасида 31 ёшдан 38 ёшгача бўлган тўрт нафар эркак ва 23 ёшдан 71 ёшгача бўлган етти нафар аёл бор.

Шунингдек, маъмурият раҳбарининг аниқлик киритишича, жабрланган 11 нафардан икки нафарига воқеа жойида тўғридан-тўғри тиббий ёрдам кўрсатилган, қолганлари эса тиббиёт муассасаларига етказилган. Жабрланганлардан бирининг аҳволи оғир.

Харьков мэри Игорь Терехов шаҳар марказидаги меҳмонхонага россиялик ҳарбийлар томонидан иккита ракета билан ҳужум қилинганини айтади. Тереховнинг сўзларига кўра, жабрланганлар орасида туркиялик журналистлар ҳам бор. Миллий полиция маълумотларига кўра, ҳужум оқибатида «Анадолу» агентлиги журналистларидан бири яраланган. Агентлик бу маълумотни тасдиқлаб, ўққа тутиш вақтида меҳмонхонада «Анадолу»нинг икки ходими бўлганини қўшимча қилади.

Бундан ташқари, шаҳар ҳокимининг маълумотлари ҳужум натижасида турар-жойлар, автосалон ва ишлаб чиқариш заводига зарар етганини кўрсатади. Синегубов, шунингдек, ушбу зарба натижасида бир нечта автомобиль ёниб кетганини ҳам қўшимча қилди.