Хитой Марказий Осиё мамлакатларига 3,7 млрд доллар беғараз ёрдам тақдим этмоқда

19 май куни Хитойнинг Сиан шаҳрида бўлиб ўтган “Хитой-Марказий Осиё” саммитида Хитой раҳбари Си Цзиньпин минтақа мамлакатларига 26 миллиард юан (3,7 миллиард доллар) миқдорида грант ажратилишини эълон қилди. Бу ҳақда “Медиазона” “Синьхуа”   агентлигига таянган ҳолда ёзади.

Қозоғистон, Туркманистон, Қирғизистон, Ўзбекистон ва Тожикистон президентлари иштирокидаги саммитда энергетика, логистика, таълим, қишлоқ хўжалиги ва саноат соҳаларида ҳамкорликни янада мустаҳкамлаш бўйича келишувга эришилди. Шунингдек Хитой илм-фан ва технология орқали камбағалликка қарши курашиш бўйича ўз тажрибасини баҳамлашишга тайёр.

Давлат раҳбарлари икки йилда бир марта навбатма-навбат Хитой ва минтақа давлатларида ўтказиладиган олий даражадаги мунтазам учрашувлар механизмини йўлга қўйишга келишиб олдилар. Кейинги учрашув 2025 йилда Қозоғистонда бўлиб ўтади.

Бундан ташқари, Хитой Каспий денгизи орқали халқаро транспорт коридори қурилишини ва Марказий Осиёда Хитой компанияларининг омборлари қурилишини ҳам қўллаб-қувватламоқда.