ИИВ Нукусда намойишчиларга қарши қандай воситалар қўллангани ҳақида маълумот берди

Источник: Газета.uz

7 июль куни, Нукусдаги намойишларни тарқатиш учун махсус техник воситалар қўлланилганидан деярли бир ҳафта ўтиб, Ўзбекистон ИИВ матбуот хизмати ушбу воситалар қандай ишлашини кўрсатувчи видеороликни намойиш қилди, деб ёзади “Газета” нашри.

Видеода айтилишича, ҳуқуқ-тартибот идоралари Жанубий Кореяда ишлаб чиқарилган ҳамда 2020 йилда кўчаларни коронавирусга қарши дезинфекция қилишда қўлланилган сув пурковчи воситадан фойдаланилди, бироқ бу сафар сув ўрнига қизил бўёқ сепилди (кўпчилик Нукус кўчаларида қизил кўлмакларни қон деб аташди, кейинчалик бунга аниқлик киритилди).

Бундан ташқари, кўз ва нафас йўлларини ачиштирувчи газли ва шовқинли гранаталар қўлланилган. «Етакчилар ва иштирокчиларни аниқлаш учун» ювилмайдиган ранг сачратадиган гранаталар ҳам ишлатилган. Нафас йўллари ва терини ачиштирадиган газли гранаталардан ҳам фойдаланилган. 2 июль куни нукусликларнинг бизга хабар беришича, 1 июлда одамлар ачишишни кетказиш учун Жўқорғи Кенгес биноси ёнидаги фавворада чўмилишган.

Шунингдек, ИИВ одамни 15 сония давомида карахт ҳолга тушириб қўядиган шовқинли гранатани ҳам намойиш қилди. White Smoke 303 гранатаси оқ тутун пуркайди. Уни қўллашдан мақсад «шахсий таркиб қайта тўпланиб олиши учун душман эътиборини чалғитиш»дан иборат. Бошқа бир 303 STRV гранатаси эса портлаган вақтда 20−30 метр радиусга резина шарикчалар отади. Одамларга қанчалик яқин бўлса, шунчалик кўп жароҳат олиши мумкин. Улардан олинган яра тахминан травматик қурол билан бир хил, дея хабар беради ходим видеода.

«Ушбу гранаталар стандартлар бўйича ишлаб чиқарилади, хориждан келтирилади, синовдан ўтказилади. Улар ўлимга олиб келмайди, лекин тартибсизликлар пайтида одамларни тинчлантириш ва тарқатиш учун ишлатилади. 717 STRV гранатаси яқин алоқада — қўлда бўлганида ёки тананинг у ёки бу қисмига текканида шикастланишга олиб келиши мумкин», — дейди видеодаги овоз.

If you have found a spelling error, please, notify us by selecting that text and pressing Ctrl+Enter.