Кейинги ўқув йилида 14 та мактабда президентга тақдим этилган янги дарсликлар бўйича ўқитиш бошланади

Президент Шавкат Мирзиёев 29 декабрь куни “Таълим сифатини ошириш – Янги Ўзбекистон тараққиётининг яккаю ягона тўғри йўлидир!” мавзусидаги замонавий дарсликлар кўргазмаси билан танишди. Кўргазмада давлат раҳбарига ушбу дарсликлар мазмуни ҳақида маълумот берилди.

Улар XXI аср кишиси учун энг зарур бўлган “4К” кўникмаси бўйича ишлаб чиқилган (критик фикрлаш, креативлик, коллаборация, коммуникация). Яъни, бу ўқувчиларда танқидий фикрлаш, ижодий ёндашув, жамоада ишлаш ва мулоқот кўникмаларини шакллантиради.

Республика бўйича 14 та тажриба мактаблари танлаб олинди, уларда кейинги ўқув йилидан янги дарсликлардан фойдаланган ҳолда ўқув машғулотларини ўтказиш режалаштирилган. Уларнинг ўқитувчилари ўқув семинарларида қатнашиб, ўқитишнинг янги усулларини ўзлаштирдилар. Ушбу мактаблар мисолида мамлакатимиздаги барча ўрта таълим муассасалари учун техник ва инфратузилма стандартлари тузилади.

1-3-синфлар учун дарсликларнинг бир қисми тўлдирилган реаллик технологияларидан фойдаланган ҳолда ишлаб чиқилган.

“Ҳозирги болалар замонавий технологияларни биздан кўра яхшироқ тушунадилар. Шундай экан, гаджетлар ёрдамида ўрганиш уларнинг таълимга кенгроқ жалб этилишига хизмат қилади”, — дейди президент.

Estudy электрон таълим платформаси ишлаб чиқилди. Турли фанлар бўйича билимларни мустаҳкамлаш учун 300 дан ортиқ ўқув ўйинларини қамраб олади. Платформадан дарс пайтида ҳам, уйда ҳам, бўш вақтингизда ҳам фойдаланиш мумкин.

Янги дарсликларни тайёрлашда PISA, PIRLS, TIMSS, EGMA, EGRA каби халқаро дастурлардаги намунавий вазифалар асос қилиб олинган. Дарслик билан бирга машғулот дафтарлари, ўқитувчилар учун методик қўлланмалар ҳам чоп этилган. Шунингдек, бу тизимга Estudy электрон таълим платформаси интеграция қилинган. Ундан дарс пайтида ҳам, бўш вақтда ҳам фойдаланиш мумкин.