Кобахидзе: Европа Иттифоқига номзод мақоми шантаж воситаси сифатида ишлатилган

«Номзод мақоми шантаж воситаси сифатида ишлатилган.» Грузия бош вазири Ираклий Кобахидзе ҳукуматнинг Европа Иттифоқига қўшилиш бўйича муҳокамаларни тўхтатиш ҳақидаги қарорини тушунтирди.

Кобахидзе 30 ноябрь куни бўлиб ўтган брифингда “музокаралар бошланишига нисбатан шантажни тўхтатиш кераклигини” айтди . Унинг сўзларига кўра, сўнгги икки йил ичида Грузия Европа Иттифоқига кириш учун номзод мақоми берилиши билан шантаж қилинган, мақом берилганидан кейин эса музокаралар билан шантаж бошланган.

“Шунинг учун биз оддий нарсани айтамиз: шантаж шу билан тўхтатилсин. Агар улар музокараларни бошлашни хоҳласалар, [тегишли ҳужжатни] столга қўйишларига рухсат беринг, мен бугун уни имзолайман. Биз бир нарсани эълон қиламиз: ўз навбатида, кейинги тўрт йил ичида бу масала кун тартибига қўйилмайди, токи ҳеч ким бундан шантаж воситаси сифатида фойдалана олмайди”, — дея Кобахидзенинг сўзларидан иқтибос келтиради 1ТВ.

Ираклий Кобахидзе биринчи марта 28 ноябрь куни мамлакатнинг Европа Иттифоқига қўшилиши бўйича ишлар тўхтатилганини маълум қилди. Шундан кейин Тбилисида оммавий норозилик намойишлари бошланди. Полиция намойишчиларга қарши кўздан ёш оқизувчи газ ва сув пуркагичлардан фойдаланган. 30 ноябрга ўтар кечаси бўлиб ўтган сўнгги митингда 107 киши ҳибсга олинган.