«Металлоинвест» украин темир рудаси компания томонидан сақлаб қўйилгани ҳақидаги УХХ ахборотини рад этди

Аввалроқ Украина хавфсизлик хизмати (УХХ) келиб чиқиши ўзбек бўлган россиялик олигарх Алишер Усмоновга тегишли икки миллиард гривнага тенг темир рудаси партиясини ҳибсга олгани ҳақида хабар берган эди. «Металлоинвест» бу маълумот ҳақиқатга тўғри келмаслигини, “бемаънилик ва компания ҳамкорлари ва ОАВ вакилларини атайлаб чалғитаётганини” айтди.

“Аслида, Украина ҳукумати ҳеч қандай қонуний асосларсиз «Металлоинвест» корхоналари томонидан Россияда ишлаб чиқарилган ва унинг хориждаги харидорлари учун мўлжалланган темир рудаси хом ашёсини ҳибсга олган”.

Компания маълумотларига кўра, 2022 йилнинг февралида Украина ҳукумати амалдаги шартномалар бўйича Украина ҳудуди орқали транзит билан кетаётган ушбу товарларнинг, хусусан, европалик истеъмолчиларга экспорт қилинишини блокировка қилиб қўйган.

“Шундай қилиб, сўз Украина расмийлари томонидан ноқонуний равишда амалга оширилган хорижлик харидорлар учун мўлжалланган эски тижорат юкини тортиб олиш факти ҳақида бормоқда. Жойлашуви Украина расмийларига қарийб бир йил давомида маълум бўлган юкнинг ҳибсга олингани фақат энди расман эълон қилингани бу акциянинг PR- мақсадларидан далолат беради”, — дея хулоса қилади компания.