МТМларга қамров кўрсатгичи пасаймоқдами

Жорий йилнинг 15 январидаги ҳолатига кўра, республикадаги 42 та туман ва шаҳарларда болаларни МТМларга қамраб олиш кўрсаткичи 2023 йил 1 январь ҳолатига нисбатан – 21 038 нафарга ёки ўртача 4 фоизга камайганлиги қайд этилган.

“Ушбу ҳолатларни зудлик билан бартараф этиш мақсадида масъулиятсизликка йўл қўйган раҳбарларга чоралар кўрилди, қуйи тизимдаги мавжуд муаммолар яқиндан ўрганилди ва жойида ҳал этиш учун ота-оналарга мактабгача таълимнинг афзалликлари тушунтирилди. Натижада қамров даражаси пасайган ҳудудлар 61 тадан, 42 тага камайтирилди”,- дейди Мактабгача таълим агентлиги ахборот хизмати раҳбари Мавлуда Асқархўжаева.

2023 йил давомида мазкур ҳудудларда янги мактабгача таълим ташкилотлари ташкил этилиб, республика бўйича қамров кўрсатгичи 74 фоизга ортганлигига қарамасдан, 6-7 ёшли болалар мактабга чиқиб кетгандан сўнг уларнинг ўрнини тўлдириш учун мақсадли ишлар амалга оширилмаган. Оқибати қуйидаги натижаларга олиб келган:

Қорақалпоғистон Республикасининг 9 та туманида 4 213 нафарга;

Андижон вилоятининг 4 та туманида 2 761 нафарга;

Жиззах вилоятининг 7 та туманида 1478 нафарга;

Фарғона вилоятининг 11 та туманида 10 427 нафарга;

Хоразм вилоятининг 4 та туманида 1269 нафарга;

Тошкент шаҳарнинг 3 та туманида 521 нафарга ва бошқа вилоятларда ҳам сезирарли даражада пасайган.

Шунингдек, кўрсаткичларнинг пасайиб кетиш сабаблари ўрганилганда, ҳудудий бошқармалар ва уларнинг туман бўлимлари томонидан Мактабгача таълимни бошқариш ахборот тизими – BBIT.UZга сохта маълумотлар киритилиб, болалар сонини сунъий равишда ошириш ҳолатлари кузатилганлиги аниқланган.