Open Budget учун SIM-карталарга ўқувчилардан пул йиғилган мактаб директори ишдан бўшатилди

Тошкент вилоятида Open Budget порталида лойиҳа учун овоз тўплашга SIM-карталар сотиб олиш учун ўқувчиларни пул беришга мажбурлаган мактаб директори ишдан бўшатилди. Бу ҳақда вилоят ҳокимлигининг матбуот хизматига таянган ҳолда “Фергана” нашри хабар беради.

Бир кун аввал ижтимоий тармоқларда видео пайдо бўлиб, унда бошланғич синф ўқувчилари сим-карта сотиб олиш учун 10-20 минг сўмдан тўламаганлар дарсга киритилмаганини айтишган эди. Тошкент вилояти ҳокимлиги бу хабарга дарҳол муносабат билдирди.

Оққўрғон тумани «Бойгули» маҳалласидаги 17-мактаб директори Л.Усмонованинг кўрсатмаси билан ўқувчилардан пул ундирилаётгани аниқланди. 45 нафар бошланғич синф ўқувчиси таҳсил олаётган мазкур мактаб филиалида ноқонуний пул йиғиш амалга оширилган.

“Ўқувчиларни ушбу акцияга мажбурлаган синф ўқитувчилари интизомий жазога тортилди, мактаб директори Л.Усмонова эгаллаб турган лавозимидан озод этилди”, — дейилади ҳокимлик хабарида.

Ҳокимликнинг қайд этишича, 17-мактаб филиали яқинда таъмирланиб, зарур жиҳозлар билан таъминланган. Филиал ходимлари 300 миллион сўм олиш ва уларга қўшимча равишда электрон доска ва компьютер техникасини харид қилиш мақсадида Open Budget порталида “Ташаббусли бюджет” лойиҳасида ўз ташаббуси билан иштирок этишга қарор қилган.

Тошкент вилояти ҳокими, вилоят халқ таълими кенгаши раиси Зойир Мирзаев мактабга ҳақиқатан ҳам ушбу жиҳозларга эҳтиёж бор-йўқлигини ўрганиш, ижобий жавоб бўлса, маҳаллий бюджет ҳисобидан таълим муассасасини таъминлаш бўйича мутасаддиларга топшириқ берди.