Россиялик сенатор Алишер Қодировга ҳозир ёмон аҳволда бўлган бир мамлакатнинг тақдири ҳақида эслатиб қўйди

Россия Федерациялар Кенгашининг халқаро масалалар бўйича қўмитаси раиси ўринбосари Андрей Климов Ўзбекистон парламенти спикерининг ўринбосари Алишер Қодировнинг сўзларига изоҳ берди.

У Россия ташқи ишлар вазирлигининг рус тили дарси пайтида Тошкентда ўқитувчи ва мактаб ўқувчиси ўртасидаги можаро билан боғлиқ вазиятга ойдинлик киритиш сўровига жавобан “ўзларининг ишлари билан шуғулланишга” чақирганди.

“Узоқ вақтдан бери шундай йўл тутган бир давлат бор эди. Энди у жуда оғир аҳволга тушиб қолган”, — деди Климов Lenta.ru билан суҳбатда. У миллатлараро муносабатлар масалаларига айниқса эҳтиёткорлик билан ёндашишни талаб қилишини қўшимча қилиб, ҳаддан ташқари кескин баёнотлар беришдан огоҳлантирди. У Қодировнинг сўзларини таажжубли деб атади.

Эслатиб ўтамиз, аввалроқ интернетда Тошкент шаҳридаги 188-мактабнинг рус тили ўқитувчиси ўқувчини дарс пайтида бир неча бор ургани тасвирланган видео пайдо бўлган эди. Тахминларга кўра, можарога ўқувчининг материални рус тилида тушунтиришни сўраши сабаб бўлган.

Олий Мажлис депутати Алишер Қодиров Тошкент мактабларидан бирида русийзабон бола билан содир бўлган воқеага изоҳ бериб, Россия томонига Ўзбекистоннинг ички ишларига аралашмасликни ва ўзининг муаммоларини ҳал этишга эътибор қаратишни тавсия қилганди.

Шерзодхон Қудратхўжа ҳам бу ҳолат ҳақида гапирди. У ўқитувчининг ўқувчига нисбатан куч ишлатишини номақбул деб атади. Бироқ, унинг нуқтаи назари бўйича, «ташқаридан  ёмон бўлган, аммо маҳаллий ҳодисага миллатлараро ва тиллараро маъно беришга уриниш» ҳам қабул қилиниши мумкин эмас.