Саудия Арабистонида фаолият кўрсатувчи компания Ўзбекистонга $52 млн инвестиция қилмоқда

Саудия Арабистонининг Jamjoom Pharma фармацевтика компанияси Ўзбекистонга 52 миллион доллардан ортиқ сармоя киритиш бўйича шартнома имзолади, – дейди компания вице-президенти Маҳмуд Жамжум.

Саудия-Ўзбекистон ишбилармонлар кенгашининг тўртинчи йиғилиши чоғида у Ўзбекистонда ўз фаолиятининг очилиши минтақага кириш дарвозаси эканлигини айтди.

“Биз аллақачон 30 дан ортиқ мамлакатлардамиз. Энди биз ушбу минтақага (Марказий Осиё) эътибор қаратишга ҳаракат қиляпмиз. Компаниямиз Ўзбекистон, Афғонистон ва Туркманистонни қамраб олади. Бу минтақани қамраш учун дарвозага айланади».

Унинг сўзларига кўра, компания назорат қилувчи органлардан рухсат олиши билан яқин вақт ичида Ўзбекистон бозорида иш бошланади. Маҳмуд Жамжум Ўзбекистонда босқичма-босқич ишлаб чиқаришни йўлга қўйиш режалаштирилаётганини таъкидлади.

Spot нашрининг ёзишича, Jamjoom Pharma 2000 йилда ташкил этилган. Унинг заводларида 100 та дори ва қўшимчалар ишлаб чиқарилади. Компания Саудия фармацевтика саноатининг етакчи иштирокчиларидан бири бўлиб, шунингдек Яқин Шарқ, Африка ва МДҲ мамлакатларида, хусусан, Қозоғистонда ўз амалиётларини кенгайтирмоқда.