Сурхондарё прокуратураси ҳибсга олинган шахсга нисбатан куч ишлатган ИИБ ходимига нисбатан хизмат текширувини ўтказмоқда

Сурхондарё вилояти ички ишлар бошқармаси ҳушёрлик пунктида ҳуқуқ-тартибот идораси ходимининг эркакка нисбатан куч ишлатгани ҳақидаги воқеага изоҳ берди.

Ижтимоий тармоқларда ҳушёрлик пунктида ИИБ ходими кийимидаги эркак қўллари боғланган ҳолда каравотда ётган эркакни бир неча бор ургани акс этган видео тарқалди.

“2023 йилнинг 6 майдан 7 май кунига ўтар кечаси  соат 01:10ларда Музработ тумани “Шаффоф” маҳалласида яшовчи фуқаро С.С исмли аёл туман ИИБ навбатчилик қисмига қўнғироқ қилиб, яшаш уйига нотаниш шахс келиб кўп марта эшигини тепиб жанжал қилаётганлиги ҳақидаги мурожаат қилган. Шу куни тунги хизматга жалб қилинган Музработ тумани ИИБ ходими М.А. чақирилган манзилга борганда фуқаро У.П. кучли алкоголь мастлик ҳолатида, ИИБ ходимининг қонуний талабини бажармагани учун уни Музработ тумани Тиббиёт марказида ташкил этилган Алкогол мастлик ҳолатидаги шахсларга тиббий ёрдам кўрсатиш туманлараро пунктига олиб борган”, – дейилади вилоят ИИБ хабарида.

Видеода (овоз йўқ) эркакнинг қорни билан ётгани ва нимадир деб бақираётгани кўрсатилган. Милиция ходими унга яқинлашган, улар нимадир ҳақида гаплашади. Ходим аввал кафти билан, кейин эса мушти билан эркакнинг юзига уради ва бошини ёстиққа босади.

Ҳуқуқ-тартибот органи ходими унинг бошини силаб, телефонини олиб, уни тасвирга олишни бошлайди. Кейин у хонани тарк этади, қайтиб келади ва суратга олишда давом эттиради. Эркак яна нимадир дейди. Кейин ходим яна кетади ва у қайтиб келганида яна бир-бирларига нимадир дейишади. Ходим яна кафти билан эркакнинг юзига уради. Кейин рўмолча олиб келиб оғзини боғлайди.

ИИБ хабарида айтилишича, ушланган шахс “тиббиёт бирлашмасида хам даволанаётган беморларнинг тинчлигини бузиб, қонуний талабларга бўйсунмасдан, қўпол сўзлар билан ҳақоратлашда давом этган У.П. ни тинчлантириш мақсадида ИИБ ходими қатъий ҳаракат қилган”.

«Ходимнинг ҳаракатлари юзасидан ҳозирда Сурхондарё вилоят ИИБ масъуллари томонидан хизмат текшируви ўтказилаётганлигини маълум қиламиз», — дейилади хабарда.