Тошкентда тунги кўча чироқларини ёритишга чеклов жорий этилди (тўлдирилди)

«Тошшаҳарнур» давлат унитар корхонаси 16 ноябрдан бошлаб вақтинчалик кўча ёритиш тармоқларининг истеъмолини тунги вақтда чеклаш режимига ўтказмоқда. Бу ҳақда корхона матбуот хизмати хабар беради.

“Умид қиламизки, Тошкент шаҳри аҳолиси ва меҳмонлари кечки ва тунги вақтинчалик ноқулайликларни тушуниб, кундалик ҳаётда электр энергиясидан энг оқилона ва тежамкор фойдаланиш бўйича умумий муаммони ҳал этишда фаол иштирок этадилар”, – дейди компания.

Сал кейинроқ “Тошшаҳарнур” корхонаси кўчаларни ёритиш тизимини энергия тежовчи режимга ўтказиш ишлари асосан марказий кўчалардаги ёритиш тизимлари ва иллюминацияларига тааллуқли эканини, кўча чироқлари эса тўлиқ ўчирилмаслигига аниқлик киритди

 «Кўчалар, тураржой массивлари ва маҳаллалар норматив даражада ёритилади», – дейилади корхона хабарида.

Аввалроқ Шерзод Хўжаев Тошкентда кўчаларни ёритиш ва реклама Лед-экранларини вақтинча ўчириш режасини маълум қилганди.

“Бу кўчалардаги ёритиш чироқларига ва кераксиз ёритиш чироқларига ҳам тааллуқлидир… Бу йўналишда биз янги иш тартибини ишлаб чиқдик: маълум вақтдан сўнг барча кераксиз ёниб турган кўча ёритиш мосламалари, рекламалар  [ЛEД экранлар] маълум соатларда тўлиқ тўхтатилади ва тежалган энергия чекка ҳудудларга юборилади”, деди у.

Энергетика вазирлиги раҳбари ўринбосарининг фикрича, ҳудудлар аҳолиси электр энергиясини кўпроқ қадрлайди, шунинг учун уни тежайди, Тошкент шаҳри ва вилоятлар марказларида узлуксиз электр таъминоти таъминланган бўлса-да, энергияни тежаш масаласи ҳамон долзарблигича қолмоқда.