Тошкентда жамоат транспорти учун ажратилган полосаларга чизиқли йўл белгиларини чизиш ишлари бошланди

Тошкентда 20 декабрь куни жамоат транспорти учун ажратилган полосаларга чизиқли белгиларни чизиш, шунингдек, йўлларни мунтазам равишда белгилаш ишлари бошланди. Ишлар тиғиз соатларда олиб борилгани сабабли пойтахтнинг деярли бутун маркази 10 балллик тирбандликда қолиб кетди, деб ёзади «Подробно» нашри.

“Ҳокимиятни бутун дунёда қабул қилинганидек, йўл ҳаракатига халақит бермаслик учун тунда эмас, балки кундузи белги қўйишга нима мажбур қилганини аниқ айтиш қийин. Катта эҳтимол билан, бу ерда иккита сабаб мос келди. Биринчиси, Қозоғистон президентининг 21-22 декабрь кунларидаги ташрифи. Ташриф жадвалига кўра, Ўзбекистон ва Қозоғистон раҳбарлари пойтахтдаги қатор объектларни бориб кўради, шу боис уларнинг ташрифи учун йўлларни тартибга солишга қарор қилинган”, — деб ёзади нашр.

Иккинчи сабаб, ички ишлар вазирлиги ва бошқа ҳуқуқни муҳофаза қилувчи идораларга президент томонидан жамоат транспорти фаолиятини яхшилаш бўйича берилган топшириқлар. Кўринишидан бир неча йиллардан буён муҳокама қилинаётган ажратилган полосаларни ташкил қилиш бўйича ишлар шу сабабли ҳам зудлик билан жадаллашган бўлса керак.

Биринчи навбатда, Амир Темур шоҳ кўчасида ажратилган полосалар пайдо бўлади. Енгил автомашиналар ҳайдовчиларига аниқ кўриниб туриши учун полосага катта «А» ҳарфи чизилган, унинг ўзи эса бошқа полосалардан узлуксиз чизиқ билан ажратилган. Агар автомобиль ҳайдовчиси ажратилган полосада ўнгга бурилиши керак бўлса, у буни махсус белгиланган жойларда фақат пунктир чизиқни кесиб ўтиш орқали амалга ошириши керак.

Ҳайдовчи ажратилган полосага фақат йўловчиларни олиш ёки тушириш учун кириши мумкин. Шундан сўнг, у жамоат транспортига халақит бермасдан, зудлик билан полосани бўшатиши керак.

Чиқиб кетаётган ва ўнгга бурилиб кетаётган транспорт воситаси ажратилган полосага кираётганида, йўлни ўзгартириш орқали уни имкон қадар тезроқ бўшатиши керак.

Йўл ҳаракати хавфсизлиги хизматининг қайд этишича, пластик фигуралар кўринишидаги тик турган ер усти белгилари билан ушбу полосаларни вақтинча чегаралашни таклиф қилган мутахассисларнинг таклифлари ўрганилмоқда. Бу ҳайдовчиларда ажратилган полосаларни четлаб ўтиш кўникмаларини шакллантириш учун зарур.

Ажратилган полосага чиққанлик учун Маъмурий жавобгарлик тўғрисидаги кодекснинг 128-моддасига мувофиқ 1/2 БҲМ (150 000 сўм) миқдорида жарима назарда тутилган. Ажратилган полосаларда тўхташ қоидаларини бузганлик учун 2 БҲМ (300 000 сўм) миқдорида жарима солинади.

Тошкент шаҳридаги айрим автобусларда йўловчилар йўл ҳаракати қоидалари бузилишини видеога олувчи махсус тизимларга эътибор қаратган. Айнан улар ажратилган полосаларга чиқиб кетган қоидабузарларни қайд этади.