Туркманистон қардош мамлакатларга газ етказиб беришга тайёр

Туркманистон Халқ Ассамблеяси раиси Гурбангули Бердимуҳамедов Туркий давлатлар ташкилоти Оқсоқоллари кенгашининг 15-йиғилишида мамлакат минтақадаги қардош давлатларга энергия ресурслари, жумладан, табиий газ ва электр энергиясини етказиб беришни кўпайтиришга тайёрлигини таъкидлади. Энергия ресурсларини ишлаб чиқарувчилар орасида етакчи ўринни эгаллаган Туркманистон ҳозирданоқ Ўзбекистон ва Қирғизистонга электр энергиясини етказиб бермоқда, экспорт ҳажмини Қозоғистон, Озарбайжон ва Туркияга ҳам кенгайтиришни режалаштирмоқда.

Бердимуҳамедов туркман газини шарқий йўналиш бўйлаб экспорт қилишга қаратилган лойиҳаларни биргаликда амалга ошириш имкониятларига эътибор қаратди ҳамда Туркманистон қўшни мамлакатларнинг энергия хавфсизлигини мустаҳкамлашга кўмаклашишга тайёрлигини билдирди. Шунингдек, у Туркий давлатлар ташкилоти мамлакатларига ўзларининг географик жойлашуви ва ресурс салоҳияти афзалликларидан максимал даражада фойдаланиш имконини берадиган Буюк Ипак йўлини қайта тиклаш учун транспорт соҳасида ҳамкорликни чуқурлаштириш тарафдори эканлигини билдирди.