Волейбол федерациясида талон-тарожликлар аниқланди

Ўзбекистон Волейбол федерацияси мансабдор шахслари ва бошқалар бюджет маблағларини жуда кўп миқдорда талон-торож қилганликда гумонланмоқда. Бош прокуратура матбуот ҳизмати ўрганиш натижаларини эълон қилди, деб ёзади “Газета” нашри.

Аниқланишича, собиқ жисмоний тарбия ва спорт вазири Дилмурод Набиевнинг буйруғига асосан, федерацияга 54 нафар спортчиларга 23 кунлик ўқув-машғулот йиғини ўтказиш учун бюджетдан 445 млн сўм ажратилган. Бироқ, машғулот йиғини амалда 10 кун ўтказилган. 231 млн сўм бюджет маблағлари ўзлаштирилган, дейилади хабарда.

Бундан ташқари, терма жамоа ва унинг захираси таркибига киритилмаган 29 нафар спортчи турли спорт йиғинларига юборилиб, 75 млн сўм маблағлар асоссиз сарфланган.

Терговга қадар текширув давомида бюджетга етказилган зарарнинг 120 млн сўми қопланган.

Бош прокуратура мазкур ҳолатлар бўйича жиноят иши қўзғатди. Ҳозирда дастлабки тергов ҳаракатлари ўтказмоқда.