Ўзбекистонда илк бор криптовалюталар билан савдо қилувчи дўконларга лицензиялар берилди

Ўзбекистонда бирданига иккита криптодўкон очилади. Crypto Trade NET ва Crypto Market компаниялари фаолият юритиш учун лицензия олди, деб ёзади “Фергана” нашри Миллий истиқболли лойиҳалар агентлиги (МИЛА)нинг матбуот хизматига таянган ҳолда.

Агентлик таъкидлаганидек, Ўзбекистон криптоактивлар муомаласини тартибга солиш бўйича яхши шаклланган қонунчилик базасига эга дунёдаги саноқли давлатлардан бири ҳисобланади. Crypto Trade NET МЧЖ ва  Crypto Market МЧЖ МДҲ ва Марказий Осиёдаги биринчи криптодўконларга айланди”, — дейилади агентлик матбуот хизматининг хабарида.

Жорий йилнинг 31 октябридан кучга кирган қоидаларга кўра, криптодўкон мижозларга электрон платформа ёки савдо объектига (офлайн) киришни таъминлаш орқали криптоактивларни сотиб олиш/сотиш бўйича операцияларни амалга оширади.

Электрон платформада Ўзбекистон фуқаролари криптоактивларни сўмга, чет элликлар эса хорижий валютага сотиб олишлари ёки сотишлари мумкин. Тўловлар банк ўтказмалари орқали амалга оширилади.

Офлайн форматда нақд тўловлар ҳам мумкин, шу билан бирга сиз миллий ва хорижий валютадаги активларни сотиб олишингиз ва уларни фақат сўмга сотишингиз мумкин.

Криптодўконлар операторлари барча мижозларни идентификациялаши шарт. Тақиқланган операцияларга қуйидагилар киради:

• мажбурий идентификациядан ўтмаган мижозлар билан операциялар;
• вояга етмаганлар билан операциялар;
• террорчилик фаолиятида ёки оммавий қирғин қуролини тарқатишда иштирок этган ёки иштирок этишда гумон қилинган шахслар рўйхатига киритилган шахслар билан операциялар;
• Ўзбекистон резидентлари томонидан чиқарилган криптоактивлар билан операциялар;
• аноним криптоактивлар билан операциялар;
• ўзаро алмашмайдиган токенлар билан операциялар.

Апрель ойида криптоактивлар муомаласи билан шуғулланувчи ташкилот ва компаниялар учун махсус режим жорий этилиши ҳақида хабар берилган эди. Улар махсус рўйхатга киритилган асбоб-ускуналар, технологик ҳужжатлар, дастурий таъминот ва эҳтиёт қисмлар импорти учун солиқлар ва мақсадли жамғармаларга мажбурий ажратмалар, божхона тўловларидан озод қилинади. Криптоактивлар соҳасидаги компаниялар ходимларининг иш ҳақи умумий қабул қилинган 12,5% ўрнига 7,5% ставкада шахсий даромад солиғига тортилади.