Ўзбекистоннинг Киевдаги элчихонаси юртдошларимизни Украинани тарк этишга чақирди

Фото с сайта Kun.uz

Ўзбекистоннинг Киевдаги элчихонаси фронтлардаги вазиятнинг кескинлашуви, шунингдек, бутун мамлакат бўйлаб ракета ва артиллерия зарбаларининг давом этиши эҳтимоли юқорилиги муносабати билан ватандошлардан шахсий хавфсизлиги учун Украинани тарк этишни сўрамоқда.

Элчихона, шунингдек, одамларни “можаро ҳал қилинмагунча” Украинага саёҳат қилишдан тийилишга чақирди.

10 октябрь куни эрталаб Украина бўйлаб Киевдан Одессагача бўлган шаҳарлар уруш бошидан бери кузатилмаган оммавий ўққа тутилди.

Украина расмийлари 14 киши ҳалок бўлгани ва 100 га яқин киши яраланганини маълум қилди. Владимир Путин бу ҳужум “Киев режими жиноятларига” жавоб эканлигини айтди ва Россия ҳудудида “террорчилик ҳужумлари давом этса” янада «қаттиқроқ» жавоб беришга ваъда берди.

Украина Россия Федерацияси Хавфсизлик кенгаши аъзолари, жумладан Дмитрий Медведев, Сергей Шойгу ва Валентина Матвиенкога нисбатан қидирув эълон қилди. Россия Федерацияси Тергов қўмитаси раҳбари Александр Бастрикин Медведевнинг “ноқонуний таъқиб қилиниши” сабабли жиноий иш очишга кўрсатма берди. Александр Лукашенко Россия ва Беларуснинг “минтақавий гуруҳланиши бошланганини” эълон қилди, у аниқ қаерда ва нима учун эканига изоҳ бермади.

If you have found a spelling error, please, notify us by selecting that text and pressing Ctrl+Enter.