Turkiyaning eng maftunkor Cittaslow shaharlari

Har yili millionlab sayyohlarni o‘ziga jalb etuvchi Turkiyaning sohilbo‘yi go‘zal viloyatlari sokin, osoyishta va tinch dam olish uchun ajoyib imkoniyatlarni taklif etadi. Turkiyaning Cittaslow shaharlarida vaqt uzayadi, an’analarga rioya qilinadi va manzaralari esa jozibali. Erta tong ajoyib boy turk nonushtalari bilan boshlanadi, kechqurun esa Egey dengizining yangi dengiz mahsulotlari, mintaqaviy zaytun moyi taomlari va nafis turk ichimliklari taqdim etiladi. Qayiq sayohatlari, suv ustida uchish, qadimiy joylarni o‘rganish… bularning barcha barchasi sizni kutmoqda!

Izmir viloyatida sokin dam olish maskanlari: Seferihisar va Focha

Egey dengizi bo‘yida joylashgan Izmir viloyati nafaqat jonli Izmir shahrini, balki Cheshme, Alachati, Urla va Kushadasi kabi bir qancha go‘zal dam olish maskanlarini ham o‘z ichiga oladi. Seferihisar Turkiyaning birinchi sekin shahri va 2009 yildan beri Cittaslow tarmog‘iga a’zo bo‘lib, Izmirdan bir soatdan kamroq masofada va eng yaqin plyajdan taxminan 20 daqiqalik masofada joylashgan. Seferihisar o‘zining mahalliy qadriyatlarini va an’anaviy qirg‘oqbo‘yi turar-joy xarakterini saqlab qolgan holda, plastmassa o‘rniga quyosh energiyasi bilan ishlaydigan ko‘cha chiroqlari va to‘rli sumkalar kabi barqarorlik tashabbuslarini ham amalga oshirdi. Aholisi mahalliy urug‘lardan o‘simliklar yetishtiradi, do‘konlarda esa hududdan olingan mahsulotlar sotiladi. Dengiz bo‘yidagi Sigajik mahallasi Seferihisar shahar markazidan bir necha kilometr uzoqlikda joylashgan bo‘lib, o‘zining yakshanba bozori bilan mashhur; Sigajik qal’asida joylashgan bozorda turli mintaqaviy va mahalliy mahsulotlar mavjud. Mandarin makoni sifatida ham tanilgan Seferihisar tumani har yili noyabr oyida mandarin festivali (Mandalina Şenliği) bilan mandarin mavsumini boshlaydi. Qolaversa, hududda qadimiy tarixiy joylar, jumladan, Ion Ittifoqining eng muhim aholi punktlaridan biri bo‘lgan Teos qadimiy shahri mavjud.

Focha shahrining nomi sohil bo‘yida yashovchi dengiz mushugidan olingan bo‘lib, tarix, tabiat va dengizning o‘ziga xos uyg‘unligini ta’minlovchi sokin aholi punktidir. Tabiat nuqtayi nazaridan, hudud yo‘qolib ketish xavfi ostida bo‘lgan O‘rta yer dengiz mushuklari uchun yashash joyi bo‘lib qolmoqda, Eski Focha, Yangi Focha, Bağarasi va Ilipinar kabi Moviy bayroqli plyajlar kanoe, yelkanli qayiq va suzish kabi sport turlarini taklif qiladi. Fochaning eski shaharchasi Eski Focha dengiz bo‘yidagi mayxonalari, novvoyxonalari va do‘stona mushuklari bo‘lgan xushmanzara mahalladir. Bu tinch baliqchi qishlog‘i qora Focha Karasi uzumlari bilan to‘la uzumzorlari va zaytun bog‘lari bilan ham mashhur. Fochada kunni boshlashning ajoyib usuli – bu nonvoyxonalardan birida pishirilgan simit yoki issiq bo‘rek tanovul qılısh, kechqurun tashrif buyuruvchilar serlimon mazali do‘lma yeyish va Focha uzumidan tayyorlangan mahalliy sharoblarni tatib ko‘rish mumkin.

Mug‘la tabiati mo‘jizasi: Akyaka

Mug‘la viloyati O‘rta yer dengizi va Egeyning kesishmasida joylashgan bo‘lib, Bodrum, Fethiye, Marmaris, Datcha va Akyaka kabi mashhur dam olish joylariga ega. Qarag‘ay o‘rmonlari bilan o‘ralgan va Go‘kova ko‘rfaziga qaragan Akyaka shahri Idyma deb nomlangan qadimgi Kariya aholi punkti o‘rniga qurilgan; shaharga boradigan yo‘lda o‘sha davrdagi tosh qabrlarni hali ham ko‘rish mumkin. O‘ymakor yog‘och uylari bilan ham mashhur bo‘lgan kichik baliqchi qishlog‘i Akyaka quyosh, qum va dengiz bilan hamohang sekin, tinch muhitga ega. Shamol syorfingi, kayt syorfing va dengizda eshkak eshish – bu hududdagi mashg‘ulotlarning atigi bir nechtasidir va ko‘rfazga qo‘shimcha ravishda Azmak daryosi ham bor. Azmak katta yer osti daryosi bo‘lib, suv yuzasiga chiqqanda dengiz suvi bilan aralashib, suzuvchilarga issiq va sovuq suvning hayratlanarli kombinatsiyasini taqdim etadi.

Turk Riviyerasining sokin poytaxti: Finike

Moviy bayroqli plyajlari, sho‘ng‘ish maskanlari va hashamatli kurortlari bilan maqtovga sazovor bo‘lgan Antaliya viloyatida, shuningdek, Finike kabi bir necha maftunkor shaharchalar joylashgan. Bu hudud miloddan avvalgi V asrda Finikiyaliklar tomonidan Finikos nomi bilan tashkil etilgan, degan qarashlar mavjud va keyinchalik tarix davomida ko‘plab boshqa sivilizatsiyalarga mezbonlik qilgan. Tumanning eng mashhur qadimiy shaharlari Limyra va Arykanda tashrif buyuruvchilar uchun ochiq. Finikening go‘zal tabiati – apelsin bog‘lari, toza plyajlar va sokin firuza ko‘rfazlari – tashrif buyuruvchilarni mintaqaning boshqa tabiiy mo‘jizalari kabi o‘ziga jalb qiladi.

Masalan, Andrea Doria ko‘rfazi Antaliya viloyatidagi eng muhtasham ko‘rfazlardan biri bo‘lib, u shaffof suvlari, yam-yashil daraxtlari va ba’zan O‘rta yer dengizi mushuklari va Caretta caretta dengiz toshbaqalariga boy plyajni o‘z ichiga oladi. Tashrif buyuruvchilar, shuningdek, Go‘kbuk kanyoniga sayohat qilishlari va ajoyib stalaktit, stalagmitlar va travertinli hovuzlarga ega Suluin g‘orini o‘rganishlari mumkin. Geografik jihatdan belgilangan Finike apelsinlari mashhur bo‘lib, tumanni, ayniqsa, meva sharbatlari, murabbo va marmelatlar kabi mahsulotlari bilan gastronomiya maskaniga aylantiradi.