Armaniston hukumati davlat to‘ntarishining oldi olingani haqida bildirdi

Armaniston Milliy xavfsizlik xizmati tomonidan “qurolli to‘ntarish yo‘li bilan hokimiyatni tortib olishga urinishning” oldi olindi, deb yozadi News.am mamlakat Tergov qo‘mitasining bayonotiga tayanib.

Tergov qo‘mitasi to‘ntarishni tayyorlashda Armanistonning besh fuqarosi, Tog‘li Qorabog‘ning sobiq ikki fuqarosi va “shaxslari hali aniqlanmagan shaxslar” ishtirok etganini da’vo qilmoqda.

Tergov ma’lumotlariga ko‘ra, 2024 yil davomida ular Armaniston fuqarolari va Tog‘li Qorabog‘ aholisini o‘z safiga jalb qilgan, ularga oyiga 220 ming rubl to‘lashga va’da bergan. Ushbu pul uchun yollanganlar yangi og‘ir qurollar bilan tanishish, ulardan foydalanishni o‘rganish va jangovar vazifani bajarish uchun Rossiyada uch oylik tayyorgarlikdan o‘tishlari kerak bo‘lgan.

Tergov qo‘mitasining ta’kidlashicha, yollanganlar Rostov-Donga yuborilgan, u yerda siyosiy qarashlariga aniqlik kiritish uchun poligraf yordamida sinovdan o‘tkazilgan. Shundan so‘ng, yollanganlar “Arbat” harbiy bazasiga joylashtirilgan, u yerda ular jangovar tayyorgarlikdan o‘tgan.

“Ularga mashg‘ulotlardan maqsad Armaniston Respublikasiga qaytish va amaldagi hukumatni ag‘darish ekani aytilgan”, — deyiladi xabarda. Yollanganlarning ba’zilari bunda ishtirok etishdan bosh tortib, Armanistonga qaytgan, boshqa gumondorlar esa “jinoyatni oxirigacha yetkaza olmagan”.

Ushbu jinoyatni sodir etgan 7 nafar shaxsga nisbatan jinoiy ish qo‘zg‘atilgan. Uch nafari qo‘lga olingan, yana to‘rt nafari qidiruvga berilgan.

Qo‘lga olingan shaxslarga nisbatan ayblov e’lon qilinib, ularga nisbatan qamoqqa olish tarzidagi ehtiyot chorasini qo‘llash to‘g‘risida sudga iltimosnomalar kiritilgan. Iltimosnomalar qanoatlantirilgan. Hozir jinoiy guruhning boshqa a’zolarini aniqlash bo‘yicha faol choralar ko‘rilmoqda, deyiladi xabarda.