Bektemir Meliqo’ziyev amerikalik raqibi ustidan g’alaba qozondi

Tunda Las Vegas professional boks oqshomiga mezbonlik qildi. Oqshomning “co main-event” jangida  o’zbekistonlik professional bokschi Bektemir Meliqo’ziyev amerikalik Devid Stivensga qarshi jang o’tkazdi.

12 roundli og’ir to’qnashuvda hakamlarning ayro qaroriga ko’ra Bektemir Meliqo’ziyev g’alaba qozondi. Ikki hakam Meliqo’ziyev foydasiga, bir hakam Stivens foydasiga qaror chiqardi.

Bu g’alaba orqali Meliqo’ziyev super o’rta vazn toifasida WBA kamari uchun rasmiy va majburiy da’vogarga aylanib oldi. Jangdan oldin har ikki bokschi ham bir xil statistikaga ega edi. Ikkisida ham 14 g’alaba bir mag’lubiyat bor edi. Bektemir prof boksdagi 15-g’alabasiga erishdi. Stivens 2-mag’lubiyatini qabul qilib oldi.