Farg‘onada o‘qituvchi 5-sinf o‘quvchisiga telefonini otib, boshini yorib qo‘ydi (video)

Bolalar ombudsmani kotibiyatiga ijtimoiy tarmoq orqali video kelib tushgan. Mazkur videodagi holat Bolalar ombudsmani tomonidan o‘rganilgan.

Aniqlanishicha, joriy yilning 5-mart kuni Marg‘ilon shahar 29-umumiy o‘rta ta’lim maktabining ingliz tili o‘qituvchisi (ayol), 2000-yilda tug‘ilgan M.E. o‘quv jarayonining 6-soat darsini 5-D sinfiga o‘tayotganda shu sinfning o‘quvchisi 23.08.2012-yilda tug‘ilgan U.J. hojatxonaga chiqib kelishni so‘ragan, o‘qituvchi javob bermagan. Bola zarurat yuzasidan sinfdan chiqqan va birozdan so‘ng qaytgach, o‘qituvchi uning ruxsatsiz harakatidan va gaplashib o‘tirishidan jahli chiqib o‘z qo‘l telefonini o‘quvchiga qarata otgan. Telefon U.J. ga tegib, oqibatda uning bosh qismi yorilgan.

U.J. ga maktab hamshirasi tomonidan birinchi yordam ko‘rsatilib, boshi bog‘langan. Uyga shu holatda borgan vaqtida bolaning onasi U.G. jarohatdan xabar topib, uni shifoxonaga olib borgan va bolaga zaruriy tibbiy muolajalar ko‘rsatilgan.

Hozirda o‘qituvchining harakati yuzasidan tuman IIB tergovga qadar tekshiruv olib bormoqda. Bu borada qo‘shimcha ma’lumot beriladi.