DXX oliy o‘quv yurtlariga noqonuniy kirish holatlarini aniqlash bo‘yicha reydlar o‘tkazdi

О‘zbekiston bo‘ylab oliy o‘quv yurtlariga noqonuniy qabul qilish holatlarini aniqlash bo‘yicha reydlar o‘tkazildi, deya xabar beradi Davlat xavfsizlik xizmati (DXX).

DXX va IIV xodimlari hamkorlikda o‘tkazilgan tezkor tadbir davomida Toshkent shahrida yashovchi fuqaroni 22 ming dollar olayotgan vaqtida qo‘lga oldi. U o‘z do‘stlari orqali fuqaroni Ichki ishlar vazirligi akademiyasiga o‘qishga kiritishda yordam berishga va’da bergan.

Qashqadaryo viloyatida Qarshi innovatsion ta’lim universiteti mutaxassisi 3 nafar fuqaroni Toshkent axborot texnologiyalari universitetining Qarshi filialiga 12 ming dollar evaziga o‘qishga kiritishga yordam berishni va’da qildi. Tezkor tadbirda huquq-tartibot idoralarining xodimlari uni 11 700 AQSh dollarini olayotgan vaqtda qo‘lga olishdi.

Toshkent viloyatida huquq-tartibot idoralari xodimlari tomonidan fuqaroni Toshkent davlat pedagogika universitetiga pul evaziga o‘qishga kiritishni taklif qilib, 10 ming dollardan 5 mingini olayotgan vaqtda qo‘lga olindi.

Olmaliqda huquq-tartibot idoralari xodimlari yuqori martabali tanishlari orqali О‘zbekiston davlat jismoniy tarbiya va sport universitetiga o‘qishga kiritib berishni va’da qilgan bolalar va o‘smirlar sport maktabi murabbiysini 3500 AQSh dollari olayotgan vaqtida qo‘lga oldi.

Huquq-tartibot idoralari xodimlari, shuningdek, fuqarodan Yunus Rajabiy nomidagi О‘zbekiston Milliy musiqa san’ati institutiga o‘qishga kirish uchun 4 ming dollar evaziga yo‘llanma berishni va amaliy imtihonda yordam qilishni va’da qilgan Urganch shahridagi ixtisoslashtirilgan san’at maktabi bo‘lim mudirini ham qo‘lga oldi.

Huquq-tartibot idoralari xodimlari ushbu shaxslarning barchasiga nisbatan tegishli moddalar bilan jinoyat ishi qo‘zg‘atgan.