Ekologlar O‘zbekiston bozorlaridagi chiqindixonalarga qarshi kurasha boshladi

Atrof-muhitni muhofaza qilish vazirligining Chiqindilarni boshqarish va aylanma iqtisodiyotni rivojlantirish agentligi, uning hududiy boshqarmalari, Ichki ishlar boshqarmasi va soliq idoralari xodimlari tomonidan Xorazm viloyatida nazorat reydlari o‘tkazildi, deb xabar bermoqda Atrof-muhitni muhofaza qilish vazirligi .

Xiva shahridagi dehqon bozorida o‘tkazilgan reyd davomida chiqindi va noqonuniy chiqindixona aniqlandi. Shuningdek, “Xiva Shahri Dehqon bozori” aksiyadorlik jamiyati bozori ma’muriyati tomonidan chiqindi yig‘ish uchun joy tashkil etilmagani, maxsus konteynerlar o‘rnatilmagani ma’lum bo‘ldi. Mazkur holat yuzasidan bozor rahbari nomiga ma’muriy bayonnoma rasmiylashtirilib, huquqiy baho berish va chora ko‘rish uchun sudga yuborildi.

Tekshiruv davomida ma’lum bo‘lishicha, bozor chiqindi yig‘uvchi korxonaga 5 million so‘m qarzdor bo‘lib qolgan, bozor rahbari bu qarzni to‘lab, hududga chiqindi qutilarini o‘rnatishni o‘z zimmasiga olgan.

O‘zbekistonda maishiy va qurilish chiqindilarini ruxsat etilmagan joylarga tashlash mansabdor shaxslarga 20 dan 30 baravarigacha (7,5 million so‘mdan 11,2 million so‘mgacha) jarima solishga sabab bo‘ladi. Bir yil ichida takroran qoidabuzarlik sodir etilgan taqdirda, 30 dan 50 BRVgacha jarima solinadi.