Gvineyada futbol o‘yinida yuzaga kelgan tartibsizliklar oqibatida 50 dan ortiq odam halok bo‘ldi

Gvineyada mahalliy jamoalar o‘rtasidagi futbol o‘yinida bahsli gol muxlislar o‘rtasida kelishmovchilikni keltirib chiqardi. Hodisa davomida sodir bo‘lgan tartibsizlik va tiqilinch oqibatida 56 kishi halok bo‘ldi, yana ko‘plab kishilar jarohat oldi. Bu haqda hukumat ma’lum qildi.

Voqea joyidan olingan video lavhalarda hakam qaroridan norozi bo‘lgan muxlislarning maydonga chiqib, bahs boshlagani ko‘rinadi. Tez orada bu nizo ommaviy tartibsizlikka aylanib ketgan.

“Bahsli penalti muxlislarni g‘azablantirdi. Ular tosh otishni boshlashdi,” deb xabar beradi Media Guinea nashri. “Shundan so‘ng, xavfsizlik xizmati ko‘zdan yosh oqizuvchi gazdan foydalangan.”

Guinea Panorama nashrining xabariga ko‘ra, bu tartibsizliklar stadiondagi vahimaga olib kelgan. Tartibni tiklash maqsadida politsiya yana ko‘zdan yosh oqizuvchi gaz ishlatgan.

Gvineya Bosh vaziri Mamadu Ouri Ba bu voqeani “futbol uchrashuvini soya ostida qoldirgan qayg‘uli hodisa” deb ta’rifladi.

Mazkur o‘yin harbiy lider Mamadi Dumbuyiga bag‘ishlangan turnirning final o‘yini bo‘lib, unda Labe va Nzerekore jamoalari o‘zaro bellashgan edi.

Oppozitsiyadagi “O‘zgarish va demokratiya uchun milliy alyans” guruhi hukumatni “bu jiddiy hodisalar uchun katta mas’uliyatga ega” deb aybladi.