Toshkentda Qatar madaniyati, hunarmandchiligi va milliy taomlari haftaligi boshlandi

Poytaxtimizdagi “Tashkent City Park” majmuasida “Qatar madaniyati, hunarmandchiligi va milliy taomlari haftaligi” boshlandi. Haftalik doirasida Qatar madaniyatini aks ettiruvchi konsert dasturlari va ko‘rgazmalar namoyish etiladi.

So‘nggi yillarda O’zbekiston Respublikasi bilan Qatar Amirligi o‘rtasidagi madaniy aloqalar rivojlanib bormoqda. O’zbekistonda o‘tkazib kelinayotgan xalqaro festivallarda Qatar vakillari faol ishtirok etmoqda.

Xususan, 2018-2024 yildagi Xalqaro maqom san’ati anjumani, 2019 yilda Xalqaro baxshi san’ati festivali, 2024 yilda o‘tkazilgan “Sharq taronalari” XIII xalqaro musiqa festivalida Qatar vakillari ishtirok etdi.

Shuningdek, Qatar Amirining O’zbekistonga tashrifi doirasida 2023 yilning 5 iyun kuni “O’zbekiston Respublikasi Hukumati va Qatar Davlati Hukumati o‘rtasida madaniy hamkorlik to‘g‘risida” memorandum  imzolandi.

2024 yilning 20-26 fevral kunlari esa Qatarning Doha shahrida “O’zbekiston madaniyati, turizmi va hunarmandchiligi” kunlari katta muvaffaqiyat bilan o‘tkazildi. Tadbirlar doirasida O’zbekiston madaniyat vaziri Ozodbek Nazarbekov va Qatar madaniyat vaziri Shayx Abdulrahmon bin Hamad Al-Tani o‘rtasida uchrashuv tashkil etildi.

Qatar madaniyati, hunarmandchiligi va milliy taomlari haftaligidan ko‘zlangan asosiy maqsad ushbu davlat madaniyatining boy merosini, uning mumtoz va xalq amaliy san’ati, ijrochilik an’analari, urf-odat va marosimlarini namoyish qilish hamda o‘zaro do‘stlik aloqalarini yanada mustahkamlashdan iborat.

“Tashkent City Park” majmuasida tadbirning tantanali ochilish marosimi bo‘lib o‘tadi.

Ushbu haftalik 14 oktyabrga qadar davom etishi ko‘zda tutilgan.

Haftalikning ochilish marosimida Qatarning rang-barang madaniy landshafti, jumladan, san’ati, nomoddiy madaniy merosi namoyishi, milliy musiqa asboblari, miniatyura va badiiy, dekorativ hamda amaliy san’ati yo‘nalishi, shuningdek, gastronomik ko‘rgazmalar tashkil etildi.

–  Ushbu madaniy haftalik O’zbekiston Respublikasi tomonidan faol qo‘llab-quvvatlangani e’tiborga molikdir, – dedi Qatar madaniyat vaziri Shayx Abdulrahmon bin Hamad Al-Tani. – Bunday yuksak ishonchdan biz juda minnatdormiz hamda katta mas’uliyatni his etmoqdamiz.

Tadbir doirasidagi maydon tomoshalari, hunarmandchilik va gastronomik ko‘rgazma tomoshasidan so‘ng, maydonda tashkil etilgan sahnada Qatar san’at ustalari ishtirokida konsert dasturi namoyish etiladi.

Haftalik davomida O’zbekistonga tashrif buyurgan Qatar madaniyat vaziri Shayx Abdulrahmon bin Hamad Al-Tani va O’zbekiston Respublikasi madaniyat vaziri Ozodbek Nazarbekov o‘rtasida hamkorlik uchrashuvi bo‘lib o‘tdi. Unda hamkorlikning kelgusidagi yangi istiqbollari belgilab olindi.