Kadastr sohasida huquqbuzarlik sodir etgan 17 ming 259 nafar shaxsga ma’muriy jarimalar qo‘llanildi

Kadastr agentligi organlari tomonidan joriy yilning birinchi yarmida o‘tkazilgan nazorat tadbirlari natijasida 31 ming 134 holatda huquqbuzarliklar aniqlangan.

Kadastr organining ko‘rsatmasiga asosan, huquqbuzarlikni birinchi marta sodir etgan, o‘zboshimchalik bilan egallangan yer uchastkasining qaytarilishini ta’minlagan va uning oqibatlarini bartaraf etgan 10 ming 199 nafar shaxs jami 88 milliard 434 million so‘m ma’muriy jarimalardan ozod etilgan. Shuningdek, huquqbuzarlik sodir etgan 17 ming 259  nafar shaxsga nisbatan ma’muriy jarimalar qo‘llanilgan.

Jumladan, 5 ming 783 nafar shaxs ko‘chmas mulkka bo‘lgan huquqlarini o‘z vaqtida davlat ro‘yxatidan o‘tkazmagani, 3 ming 959 nafar shaxs yer uchastkalarini o‘zboshimchalik bilan egallab olgani, 6 ming 335 nafar shaxs o‘zboshimchalik bilan egallab olingan yer uchastkasida qurilish ishlarini amalga oshirgani uchun ma’muriy javobgarlikka tortildi.

Yer resurslarini talon-toroj qilgan va sug‘oriladigan yerlarni qurilish qilgan holda egallab olgan 1 ming 46 nafar shaxsga nisbatan to‘plangan materiallar prokuratura organlariga yuborilgan, prokuratura organlari tomonidan 418 ta material bo‘yicha jinoyat ishlari qo‘zg‘atilgan.