Ko‘zi ojiz shaxslarning pensiyalariga qancha foiz ustama haq to‘lanadi

Hozirgi paytda nogironligi bo‘lgan shaxslarning soni jahon miqyosida taxminan 1 milliardni tashkil etadi.

Mamlakatda nogironligi bo‘lgan shaxslarning huquqlarini ta’minlashning asosiy prinsiplari belgilab berilgan. Shuningdek, mavjud qonunchilikka asosan, imkoniyati cheklangan shaxslarni davlat tomonidan qo‘llab-quvvatlash tizimini tubdan takomillashtirish borasida bir qancha zaruriy chora-tadbirlar amalga oshirilmoqda.

“Fuqarolarning davlat pensiya ta’minoti to‘g‘risida”gi O‘zbekiston Respublikasi qonunining 28-moddasiga ko‘ra, ko‘zi ojizlik bo‘yicha I guruh nogironligi bo‘lgan shaxslarga pensiyani hisoblash bazaviy miqdorining 100 foizi miqdorida pensiyalariga ustama haq to‘lanishi belgilangan. Hozirda pensiyani hisoblash bazaviy miqdori 428 ming so‘mni tashkil etadi.

Shuningdek, Qonunchilikka muvofiq, I va II guruh nogironligi bo‘lgan shaxslar va mustaqil harakatlanish hamda pensiyalarni sayyor kassalarda olish imkoniyati bo‘lmagan shaxslarga pensiyalar Xalq banki filiali tomonidan bevosita ularning yashash joyiga yetkazib beriladi.

Fuqaro I va II guruh nogironlik pensiyasi tayinlanganidan keyin kamida 1 yil ish stajiga ega bo‘lsa, uning arizasi asosida ish staji va ish haqi inobatga olingan holda pensiyasi har 2 yilda bir marotaba qayta hisoblab beriladi.

Nogironligi bo‘lgan bolani 8 yoshgacha tarbiya qilgan bolaning onasiga pensiya tayinlashda talab qilinadigan 20 yillik ish stajiga nogironligi bo‘lgan bolaga qaragan davri qo‘shib hisoblanadi.

Yuqorida nazarda tutilgan davr, ish staji kamida 7 yil mavjud bo‘lgan taqdirdagina qo‘shib hisoblanadi. Mazkur talablarga javob bergan holda fuqaroda kamida 20 yil ish staji mavjud bo‘lsa, imtiyozli 50 yoshdan yoshga doir pensiyaga chiqishi mumkin.