Novosibirskda migrantlar oilasi tazyiq sabab ko‘chib ketishga majbur bo‘ldi

Novosibirsk yaqinidagi Svetliy qishlog‘ida migrantlar oilasi farzandining tazyiqqa uchrashi ortidan noto‘g‘ri ayblovlarga duch kelganidan so‘ng, boshqa joyga ko‘chib ketishga majbur bo‘ldi.

Voqea 12-sentabr kuni boshlanib, ikkinchi sinfda o‘qiydigan migrant bola beshinchi sinf o‘quvchilari tomonidan haqoratlangan. Shu sabab uning ota-onasi maktabga borib, vaziyatni aniqlashga harakat qilishgan. Keyinroq, tazyiq qilgan o‘quvchilardan biri va uning ota-onasi migrant oilani farzandlarini o‘g‘irlash va o‘ldirish bilan qo‘rqitishda ayblashdi.

Migrant bolaning onasi Raziyaning so‘zlariga ko‘ra, ular farzandini maktabga olib borayotganda uning tazyiqchisini ko‘rishgan va uni ham maktabga olib ketishni taklif qilishgan. Bola avvaliga qochishga uringan, lekin keyin o‘zi mashinaga o‘tirgan va ular maktabga birga kelishgan.

Shunga qaramay, oila otasi bolaning o‘g‘irlanishida ayblanib, surishtiruvga chaqirilgan. Tergov davomida otani bir necha kun davomida so‘roq qilishgan, hattoki ikkinchi sinf o‘quvchisi ham tunda so‘roqqa chaqirilgan. Hozirda tergov davom etmoqda, ota esa o‘zini himoya qilish uchun hujjatlarni rasmiylashtirish maqsadida Qirg‘izistonga ketgan.

Migrantlar oilasi maktabning beparvoligi va bo‘hton sabab sudga murojaat qilgan. Oila hozirgi vaziyatdan chiqish uchun boshqa joyga ko‘chishga majbur bo‘ldi.

Hozirgi paytda voqea huquq himoyachisi Anna Tajeeva tomonidan eʼlon qilinib, maktab o‘qituvchilarining masʼuliyatsizligi haqida so‘rov qo‘zg‘atilgan. U konfliktni boshlang‘ich bosqichda hal qilish mumkinligini, lekin pedagoglar yetarlicha chora ko‘rmaganligini taʼkidlamoqda.

Tergov davom etmoqda va holatni aniqlash uchun qo‘shimcha tadbirlar o‘tkazilmoqda.