О‘quvchini urgan o‘qituvchi boshqa maktabda janjal ko‘targani uchun 7 sutkaga hibsga olindi

Toshkentdagi 188-maktabda bolani kaltaklagan o‘qituvchi qizi o‘qiydigan boshqa maktabda janjal uyushtirdi. Sud unga nisbatan yetti sutkaga qamoqqa olish va 3,4 million so‘m jarimaga tortish jazosini tayinladi, deb yozadi Kun.uz.

24-sentyabr kuni ayol Yashnobod tumanidagi 204-maktabga kelgan, ta’lim muassasasi rahbariyati bilan janjallashib, direktorning tarbiyaviy ishlar bo‘yicha o‘rinbosarini urib yuborgan.

Xabarda, shuningdek, maktab rasmiylari bilan mojarodan so‘ng, undan jamoat tartibini saqlash so‘ralgan, ammo u Milliy gvardiya zobitlariga nisbatan “g‘ayriijtimoiy xatti-harakatlar”ni ko‘rsatgan. Bu harakatlar ko‘plab o‘quvchilarning ko‘z o‘ngida bo‘lgan.

25-sentyabr kuni sud o‘qituvchini Ma’muriy javobgarlik to‘g‘risidagi kodeksning 183 (mayda bezorilik), 194-1 (О‘zbekiston Milliy gvardiyasi harbiy xizmatchisi (xodimi)ning qonuniy talablariga rioya qilmaslik) va 197-5 (o‘quv faoliyatiga noqonuniy aralashish, ta’lim muassasasi o‘qituvchisining kasbiy faoliyati yoki uning xizmat vazifalarini bajarishiga to‘sqinlik) moddalari bilan aybdor deb topdi va unga nisbatan 7 sutkaga qamoqqa olish va 3,4 million so‘m miqdorida jarimaga tortish jazosiga hukm qilindi.