О‘zbekistonda tibbiy buyumlar va retseptsiz dorilarga qo‘yilgan narx cheklovlari bekor qilinishi mumkin

О‘zbekistonda tibbiy buyumlar va retseptsiz sotiladigan dori vositalari narxlariga qo‘yilgan cheklovlar bekor qilinishi rejalashtirilmoqda. Bu haqda Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi direktori Abdulla Azizov ma’lum qildi.

Ayni paytda ustama chegarasi distribyutorlar uchun maksimal 15% va dorixonalar uchun 20% ni tashkil etadi, chegaraviy narxlar faqat retsept bo‘yicha sotiladigan  dori-darmonlar uchun saqlanadi. Shuningdek, barcha farmatsevtika kompaniyalari QQS to‘lovchilariga aylanadi.

Abdulla Azizovning so‘zlariga ko‘ra, bu taklif Prezident Administratsiyasida ko‘rib chiqilmoqda va farmon 2-3 hafta ichida e’lon qilinishi kutilmoqda. Ishbilarmonlar savdo belgisiga qo‘yilgan cheklovlar tufayli dori-darmon va tibbiyot buyumlari kontrabandasi avj olgani, QQS imtiyozlari bekor qilinganidan keyin kontrabanda mahsulotlari hajmi oshishi mumkinligidan xavotir bildirmoqda. Shuningdek, dori vositalari ko‘p miqdorda, tibbiy mahsulotlar esa 1000 donagacha bo‘lgan kichik hajmda sotilayotganini ta’kidlashmoqda.

2017-yilda О‘zbekistonda distribyutorlar va dorixonalar uchun tibbiy mahsulotlar va retseptsiz sotiladigan dori vositalariga maksimal ustama joriy etilgandi.