O‘zbekistonda Ramazon hayiti kunlari harorat +30 darajagacha ko‘tariladi

O‘zgidromet xizmati agentligi 8-apreldan 14-aprelga qadar bo‘lgan bir hafta uchun ob-havo prognozini e’lon qildi.

Bugun, 8-aprel kuni kunduzi respublika hududining katta qismida quruq va juda iliq ob-havo saqlanib turadi, harorat 22-27 , janubda 30^o gacha bo‘ladi.

Faqat Qoraqalpog‘iston Respublikasi, Xorazm viloyatida va Navoiy viloyati shimolida ba’zi joylarda biroz yomg‘ir yog‘ishi mumkin.

Ertaga, 9-aprel kuni Toshkent, Samarqand, Jizzax, Sirdaryo viloyatlarida va Farg‘ona vodiysi viloyatlarida ba’zi joylarda yomg‘ir yog‘adi va havo harorati 15-20^o  gacha pasayadi. Buxoro, Navoiy viloyatlarida faqat kechasi va ertalab biroz yomg‘ir yog‘ishi mumkin. Qoraqalpog‘iston Respublikasi, Xorazm, Qashqadaryo, Surxondaryo viloyatlarida yog‘ingarchilik kutilmaydi. Havo harorati 15-20^o  gacha pasayadi.

10—11-aprelda O‘zbekistonning barcha hududlari bo‘yicha yog‘ingarchilik kutilmaydi. Havo harorati yana 22-27^o gacha, janubda 30^o gacha ko‘tariladi.

12—14-aprel kunlari beqaror ob-havo bo‘lishi kutilmoqda. Ba’zi joylarda yomg‘ir yog‘adi, ayrim joylarda momaqaldiroq bo‘ladi. Harorat asosan kechalari 7-12^o, kunduz kunlari 18-23^o bo‘ladi. Respublika shimolida yomg‘ir yog‘ishi ehtimoli kam.

Tog‘li hududlarda 9 va 12—14-aprel kunlari vaqti-vaqti bilan yog‘ingarchilik (yomg‘ir, baland tog‘larda qor) bo‘ladi. Qor ko‘chishi xavfi saqlanib turadi.

Respublikaning ayrim joylarida shamol tezligi 15-20 m/s gacha kuchayishi mumkin.

Poytaxtda: bugun kunduzi havo asosan biroz bulutli bo‘ladi, yog‘ingarchilik kutilmaydi. Harorat 24-26^o bo‘ladi.

9-aprelda ertalab va kunning birinchi yarmida vaqti-vaqti bilan yomg‘ir yog‘adi. Harorat 16-18^o bo‘ladi.

10—11-aprelda yog‘ingarchilik kutilmaydi. Harorat 22-24^o bo‘ladi.

12-aprelda kunning ikkinchi yarmida va 13—14-aprel kunlari vaqti-vaqti bilan yomg‘ir yog‘adi. Harorat 18-23^o bo‘ladi.

Harorat asosan kechalari 7-12^o bo‘ladi.