Turkiyada ota-ona qarovisiz qolib ketgan bolalar O‘zbekistonga qaytarildi

Xorijdagi vatandoshlarimizga ijtimoiy-huquqiy yordam ko‘rsatish tadbirlari doirasida Turkiyada ota-onasining qarovisiz qolib ketgan 3 nafar voyaga yetmagan bolalar vatanimizga qaytarilishiga erishildi, deb xabar bermoqda O‘zbekistonning Istanbuldashi bosh konsulxonasi.

Jumladan, turli sabablar tufayli ota-onasining qaromog‘idan mahrum bo‘lgan 16 yoshli va 6 yoshli 2 nafar qizlar va 11 yoshli 1 nafar o‘g‘il bola yaqin qarindoshlarining murojaatlari asosida Istanbul shahridagi Bosh konsulxonasi, O‘zbekiston Respublikasi Ichki ishlar va Sog‘liqni saqlash vazirliklari hamkorligida amalga oshirilgan chora-tadbirlar natijasida joriy yil 2-oktabr kuni mas’ul xodimlarning kuzatuvi ostida Toshkent shahriga yuborildi.

Muassasa ota-onalardan voyaga yetmagan farzandlarini xorijiy davlatlarda nazoratsiz qoldirmaslik, befarq bo‘lmagan fuqarolarimizdan esa chet elda qarovsiz qolib ketgan bolajonlar to‘g‘risida zudlik bilan O’zbekiston Respublikasining xorijiy diplomatik vakolatxonalariga xabar berishni so‘rab qoldi.