Oʻzbekiston va Vetnam tashqi ishlar vazirlari oʻrtasida telefon orqali muloqot boʻlib oʻtdi

O‘zbekiston tashqi ishlar vaziri Baxtiyor Saidov Vetnam tashqi ishlar vaziri Buy Txan Son bilan telefon orqali muloqot qildi.

O‘zbekiston Tashqi ishlar vazirligi rahbari O‘zbekiston Prezidenti Shavkat Mirziyoyev nomidan Kommunistik partiya Markaziy qo‘mitasi Bosh kotibi Nguyen Phu Trong vafoti munosabati bilan yana bir bor samimiy hamdardlik bildirdi.

“Mamlakatlarimiz ikki tomonlama munosabatlarni boyitish, jadal hamkorlikni rivojlantirish, barcha sohalarda yangi bog‘lovchi ko‘priklarni yaratish uchun ko‘plab imkoniyatlardan foydalanishi mumkin”, – dedi Baxtiyor Saidov.

Vazirlar bo‘lajak oliy darajadagi almashinuvlar, iqtisodiy aloqalarni rivojlantirish, sarmoyalarni rag‘batlantirishni muhokama qildilar.

“Biz O‘zbekiston va Vetnam tashqi ishlar vazirliklari o‘rtasida o‘rnatilgan yaqin hamkorlikni yuksak qadrlaymiz”, – dedi O‘zbekiston TIV rahbari.