O‘zbekistonlik yosh polvon Alisher G‘aniyev jahon chempionati finaliga chiqdi

Albaniya poytaxti Tirana shahrida yunon-rum kurashi bo‘yicha 23 yoshgacha bo‘lgan o‘smirlar o‘rtasidagi jahon chempionati bo‘lib o‘tmoqda. Musobaqaning birinchi kunida vazni 60, 67, 72, 82 va 97 kilogrammgacha bo‘lgan polvonlar bahs olib borishdi.

Alisher G‘aniyev (60 kg), Abror Otaboev (72 kg) va Samandar Bobonazarov (82 kg) janglarda muvaffaqiyatli ishtirok etdi.

Abror Otaboev puerto-rikolik Brandon Navarroni 8:0, ozarbayjonlik Ruslan Nurullayevni 3:2 hisobida yengdi, ammo chorak finalda shvetsiyalik Georgis Barbanosga imkoniyatni boy berdi (2:3).

Samandar Bobonazarov vengriyalik Miklos Kiralxazini (8:0) mag‘lub etdi, ammo yarim finalda germaniyalik Denis Nakayevga 4:1 hisobida imkoniyatni boy berdi.

Vazni 60 kilogrammgacha bo‘lgan polvonlar bahsida Alisher G‘aniyev avvaliga germaniyalik Georgios Skarpeloni (9:0), so‘ngra chorak finalda ukrainalik Bogdan Grishinni (11:2) mag‘lubiyatga uchratdi. U yarim finalda ozarbayjonlik Nihad Guluzadeni ishonchli mag‘lub etib (9:0) finalga yo‘l oldi.

Bugun, 22-oktabr kuni G‘aniyev finalda neytral sportchi sifatida ishtirok etayotgan rossiyalik Dinislom Bammatov bilan uchrashadi.

Shuningdek, kun davomida 55, 63, 77, 87 va 130 kilogrammgacha bo‘lgan vazn toifalarida saralash bahslari bo‘lib o‘tadi.