Prezident muftiy shayx Nuriddin Xoliqnazar bilan telefon orqali muloqat qildi

Prezident Shavkat Mirziyoyev Musulmonlar idorasi raisi, muftiy shayx Nuriddin Xoliqnazar bilan telefon orqali muloqot qildi.

Davlat rahbari muborak Haj ziyoratiga tayyorgarlik jarayonlari, o‘zbekistonliklar uchun yaratilgan sharoitlar, ularning salomatligi va kayfiyati haqida so‘radi.

Shayx Nuriddin Xoliqnazar Shavkat Mirziyoyevga, avvalo, muborak joylarda ibodat fayzi bilan yurgan hojilarning salomi va duolarini yetkazdi.

“Bu yil ham Haj tadbirlari yuqori saviyada, tartibli tashkil etilgani ta’kidlandi. Hududlardagi Haj markazlari orqali ishlar uyushqoqlik bilan olib borildi. Vazirlar Mahkamasi boshchiligida Din ishlari bo‘yicha qo‘mita, Tashqi ishlar vazirligi, Transport vazirligi, Sog‘liqni saqlash vazirligi va boshqa tuzilmalar hamkorligida ziyoratchilar uchun barcha sharoit yaratildi”, – deyiladi xabarda.

Ayni paytda qariyb 12 ming nafar ziyoratchilar Saudiya Arabistonida bo‘lib turibdi. Jami 15 ming 130 nafar fuqaro Haj ibodatiga muyassar bo‘ladi. Ularga 300 nafar guruh rahbari, 50 nafar oliy toifali shifokor, oshpazlar, tarjimonlar va boshqa ko‘makchilar hamrohlik qiladi.

Bu yildan boshlab bir yangilik – Saudiya Arabistonida bo‘lib turgan diniy soha xodimlari hamda qori ziyoratchilar tomonidan Qur’oni karimni xatm qilish yo‘lga qo‘yildi. Hozirgacha 1 ming 515 ta xatm o‘qilib, O‘zbekistonga tinchlik, xalqimizga farovonlik tilab duolar qilingan.

Davlat rahbari yurtdoshlar muqaddas Haj ibodatini mukammal ado etib, sog‘-omon kelishlarini tiladi. O‘zbekistonga qaytgach, hojilar jamiyatdagi mehr-oqibat muhitini mustahkamlash, jaholatga qarshi ma’rifat bilan kurashish, yoshlar tarbiyasi va oilalar totuvligida ibrat bo‘lishlariga umid bildirdi.

Suhbat samimiy va ko‘tarinki ruhda o‘tdi.