Prokuratura jurnalist Ramina Yagafarova vafoti yuzasidan jinoyat ishi qo‘zg‘atishni rad qilish haqidagi qarorni o’rganishni boshladi

Bosh prokuratura tomonidan fuqaro Diana Yagafarovaning marhuma jurnalist Ramina Yagafarovaning vafot etganligi holati yuzasidan o‘tkazilgan tekshirish natijalaridan norozi ekanligi haqidagi yozma va videomurojaatlari o‘rganilmoqda.

2023-yil 13-sentyabr kuni jurnalist Ramina Yagafarova vafot etganligi holati yuzasidan ommaviy axborot vositalari vakillarining so‘roviga javoban dastabki ma’lumotlar asosida tayyorlangan tezkor rasmiy izoh taqdim etilgan.

Izohda 2023-yil 14-sentyabr kungi dastlabki tibbiy ma’lumotnomaga asoslanib, “marhumaning o‘limi dori-darmonlarga allergik reaksiya (levofloksatsin), miya va o‘pkaning o‘tkir shishishi, o‘tkir nafas va yurak-qon tomir yetishmovchiligi, anafilaktik shok oqibatida yuzaga kelganligi” ko‘rsatilgan.

Sud-tibbiyot ekspertizasining 01.11.2023 yildagi yakuniy xulosasida esa marhuma R.Yagofarovaning o‘limi-yuqori nafas yo‘llarini qusuq massalari bilan berkilishi natijasida mexanik asfiksiya-aspiratsion sindromdan yuz berganligi qayd etilgan.

Chilonzor tumani prokuraturasi tomonidan o‘tkazilgan tergovga qadar tekshirish natijasiga ko‘ra, marhuma R.Yagafarovaning vafot etganligi holatida jinoiy hodisa yuz bermaganligi sababli, jinoyat ishi qo‘zg‘atishni rad qilish haqida qaror qabul qilingan.

Hozirda Diana Irtuganovaning murojaatlarida keltirilgan vajlar asosida Chilonzor tumani prokuraturasi tomonidan qabul qilingan jinoyat ishi qo‘zg‘atishni rad qilish haqidagi qarori nazorat tartibida o‘rganilmoqda.