Rossiya Ukrainaga rekord darajada ko‘p dronlar bilan hujum qildi

10-noyabrga o‘tar kechasi Rossiya Ukrainaga rekord darajada ko‘p dronlar bilan hujum qildi, deb yozmoqda Ukraina Qurolli kuchlari. Kecha davomida Ukraina Qurolli kuchlari 145 ta “havo nishoni” — Shahed turidagi zarba beruvchi dronlar va noma’lum turdagi boshqa dronlarni aniqlagan.

Ukraina Qurolli kuchlari xabariga ko‘ra, 62 ta rus droni urib tushirilgan, yana 67 tasi “radar bilan yo‘qolgan”, o‘nta dron esa Ukraina havo hududidan Moldova, Belarus va Rossiya tomon chiqib ketgan.

Hujumlar natijasida Odessada turar joy binolari, do‘konlar, garajlar va avtomobillar shikastlangan. Ba’zi joylarda dronlar qulaganidan so‘ng yong‘inlar yuzaga kelgan. Odessa meri Gennadiy Truxanovning xabariga ko‘ra, ikki kishi jarohatlangan.

Xarkov viloyatida esa 63 yoshli erkak og‘ir ahvolda kasalxonaga yotqizilgan, turar joy binosi va bir nechta avtomobillar yonib ketgan. Kiyevda esa Ukraina havo mudofaasi tomonidan taxminan o‘n beshta dron urib tushirilgan, Kiyev viloyatida bir uy yonib ketgan, lekin talofatlar yo‘q.