Respublika ruhiy salomatlik markazining vazifalari belgilandi

Vazirlar Mahkamasining 24.07.2024-yildagi “O’zbekiston Respublikasida ixtisoslashtirilgan psixiatriya va  narkologiya xizmatini  ko‘rsatishning  yagona tashkiliy-uslubiy vertikal boshqaruv tizimini joriy etish to‘g‘risida”gi VMQ-447-sonli qarori qabul qilindi, deb yozadi “Norma”.

Respublika ixtisoslashtirilgan ruhiy salomatlik ilmiy-amaliy tibbiyot markazi va uning hududiy filiallarining quyidagi asosiy vazifalari belgilandi:

• psixiatriya yordami xizmatlarini birlamchi tibbiy yordam muassasalariga integratsiya qilish orqali ruhiy kasalliklarni erta aniqlash va davolash;
• birlamchi bo‘g‘in tibbiyot muassasasi shifokorlarining ruhiy kasallarni klinik baholash, davolash va kuzatish bo‘yicha ko‘nikma va bilimlarini oshirish;
• aholi, ayniqsa bolalar va o‘smirlarning ruhiy salomatligini mustahkamlash;
• tibbiyot xodimlarining kasbiy darajasini oshirish va takomillashtirish, shu jumladan mutaxassislarning kasalliklariga tashxis qo‘yish va ularni davolashning zamonaviy usullari sohasida yetakchi xorijiy tibbiyot o‘quv yurtlari va klinikalarida stajirovkalarini tashkil etish;
• kasalliklarning oldini olish, tashxis qo‘yish va davolashning ilg‘or usullari va texnologiyalarini ishlab chiqishga qaratilgan ilmiy tadqiqotlar o‘tkazish, shuningdek ularni tibbiyot amaliyotiga joriy etish;
• etakchi xorijiy tibbiyot muassasalari bilan xalqaro hamkorlikni kengaytirish va mustahkamlash.

Markaz sog‘liqni saqlashning barcha darajalarida ruhiy salomatlikni ta’minlash yo‘nalishidagi ishlarni muvofiqlashtiradi va nazorat qiladi.

Hujjat bilan amaldagi psixiatriya va narkologiya xizmatlarini hududiy filiallarga qayta tashkil etilishini hisobga olgan holda Markazning tashkiliy tuzilmasi tasdiqlandi.

Hujjat Qonun hujjatlari ma’lumotlari milliy bazasida davlat tilida e’lon qilingan va 2024-yil 25-iyuldan kuchga kirgan.