Sun’iy yo‘ldosh Rossiyaning “Kavkaz” portiga berilgan zarba oqibatlarini qayd qildi

Rossiya Federatsiyasining Krasnodar o‘lkasidagi Kavkaz portida Ukrainaning Rossiya paromiga uyushtirgan hujumi sezilarli vayronagarchilikka olib kelgan, buni 23-avgust kuni “Planet Labs”dan olingan va “Ozodlik radiosi” tomonidan e’lon qilingan sun’iy yo‘ldosh suratlari tasdiqlamoqda.

Tasvirlarda vayron qilingan parom va yaqin atrofdagi bir qancha kichik kemalar aks etgan, ular ham hujumdan zarar ko‘rgan.

Bundan tashqari, tasvirlarda shikastlangan infratuzilma, jumladan, suvga olib boradigan temir yo‘l ham aks etgan.

Eslatib o‘tamiz, 22-avgust kuni “Kavkaz” portida yoqilg‘i ortilgan temir yo‘l paromida yong‘in sodir bo‘lgan, bunga Ukrainaning raketa zarbasi sabab bo‘lgan.

Keyinroq Rossiya Federatsiyasi Krasnodar o‘lkasining tezkor shtab-kvartirasi yoqilg‘i solingan 30 ta tsisternali parom cho‘kib ketganini tasdiqladi.

23-avgust kuni Ukraina harbiy-dengiz kuchlari Rossiyaning “Konro Treyder” temir yo‘l paromi “Kavkaz” portida yo‘q qilinganini rasman tasdiqladi.