70 yil “temir o‘pka” qurilmasida yashagan amerikalik huquqshunos Pol Aleksander vafot etdi

Falajlik tufayli 70 yil umrini “temir o‘pka” sun’iy nafas oldirish qurilmasida o‘tkazgan amerikalik huquqshunos Pol Aleksander 78 yoshida vafot etdi, deb xabar bermoqda “Kommersant”.

Xayriya yig‘ish platformasi — GoFundMe xabariga ko‘ra, u 11-mart kuni Dallasdagi kasalxonada vafot etgan, u yerga koronavirus tufayli yotqizilgan edi.

Pol Aleksander 1952-yilda, 6 yoshida poliomiyelit (bolalar orqa miya falajligi)ga chalingan. Unga traxeostomiya amaliyoti o‘tkazilgan, so‘ng “temir o‘pka” qurilmasiga joylashtirilgan. U germatik kamera bo‘lib, o‘pkalardan havoni chiqarish va kiritish uchun bosim ko‘tariladi va pasaytiriladi.

Pol Aleksander bir necha soat davomida qurilmasiz yashay olardi. 1978-yilda u Texas universiteti huquqshunoslik fakultetini tamomlagan, yurisprudensiya sohasida doktor darajasini olgan, so‘ng advokat bo‘lib ishlagan. So‘nggi yillarda Pol Aleksander qurilmasiz nafas ololmay qolgan. 2020-yilda u “temir o‘pka” yordamida eng uzoq umr ko‘rgan odam sifatida Ginnesning rekordlar kitobiga kiritilgan. O‘sha paytlari u “It uchun uch daqiqa. Temir o‘pkada yashayotgan odam hikoyasi” nomli avtobiografik kitobini chiqargan.