Toshkentning ayrim tumanlarida ta’mirlash ishlari munosabati bilan gaz o‘chiriladi

12-noyabrdan boshlab ta’mirlash ishlari munosabati bilan Toshkent shahrining to‘rtta tumanida gaz ta’minoti vaqtincha to‘xtatiladi, deya xabar beradi “Hududgaz Poytaxt” gaz ta’minoti filiali.

Sirg‘ali va Bektemir tumanlarida soat 10:00 dan 14:00 gacha, Mirobod va Yakkasaroy tumanlarida esa soat 10:00 dan 17:00 gacha gaz uzatilishini to‘xtatish rejalashtirilgan.

Ta’mirlash ishlari yakunlangach, tabiiy gaz ta’minoti tiklanadi. “Gaz ta’minoti filiali yuzaga kelgan noqulayliklar uchun iste’molchilardan uzr so‘raydi”, — deyiladi xabarda.